“НТВ” ханаалга соторутааҕыта саҥа биэрии — “Магия” шоу тахсар диэн биллэриини көрбүтүм. Дьиктиргэппитэ диэн, шоуну Украина саҥа талыллыбыт бэрэсидьиэнэ Владимир Зеленскэй уонна артыыска Татьяна Лазарева ыыталлар үһү.
Владимир Зеленскэй артыыс буоларын бары да иһиттибит-биллибит ини. Ол гынан баран, былдьаһыктаах бырта сыата буолбут дойду бэрэсидьиэнинэн талыллаат, “НТВ” курдук ханаалга тоҕо да ыытааччы буоллаҕай?
Дьэ, ол эрээри, бу сонуммут, буоларын курдук, биир “ноолоох” эбит. “Магия” биэриини 2011 сыллаахха “Россия 1” ханаалга устан баран, тоҕо эрэ, эпииргэ таһаарбатахтар эбит. Бу бырайыагынан «ВайТ Медиа» диэн хампаанньа дьарыктаммыт. Бу сотору тахсыахтаах “Магия” шоуга Арассыыйа шоу-бизнеһин сулустара кытталлар. Кинилэр биллиилээх фокусниктар, иллюзионистар көмөлөрүнэн араас фокустары оҥорорго холоноллор.
Өр сылларга ол остуол анныгар баттана сыппыт биэриини “нтв”-лар обургулар истэ-билэ охсон, быыбар айдаана сойо илигинэ, итиитинэ таһаара охсорго туруммуттар эбит. Төһө суумаҕа атыылаһан ылбыттара биллибэт. Арай, бу биэриини Арассыыйа үгүс олохтоохторо көтүппэккэ көрөллөрө саарбахтаммат. Тоҕо диэтэр, бу Зеленскэй диэн киһи хайдаҕа-туга, Арассыыйаҕа хайдах сыһыаннааҕа биллибэт. Соторутааҥҥа диэри бу Владимир Зеленскэй диэн киһи кимин-тугун ким да билбэт этэ, билигин киниттэн биһиги дойдуларбыт хайдах сыһыаҥҥа кэлэллэрэ тутулуктаах. Арай, биллэринэн, Зеленскэй нууччалыы олус ыраастык саҥарар. Быыбар иннинээҕи этиилэриттэн сабаҕалаатахха, «Крымы уонна Донбаһы Арассыыйа оккупациялыыртан аккаастаннаҕына эрэ, биир тылы булан кэпсэтэргэ бэлэммит…» диэн этэрэ элбэҕи толкуйдатар.
Сыта-тура ырытан көрдөххө, бу биэрии син биир дьон хараҕын баайарга, албынныырга үөрэтэр эбит ээ, оччотугар бу туох битэ эбитэ буолла?!
Ыспыраапка
Владимир Александрович Зеленскэй 1978 сыл тохсунньу 25 күнүгэр Днепропетровскай уобалас Кривой Рог куоратыгар төрөөбүт. Украина Бэрэсидьиэнигэр 2019 сыллаах быыбарга «Слуга народа» баартыйаттан туран, кыайбыт.
Кини кэмиэдьийэни оонньуур артыыс, режиссер, продюсер, сценарист, пародист, шоумен быһыытынан биллэр. «квартал-95» студияны тэрийбитэ. эдэр сылдьан «КВН»-ҥа оонньуур этэ. Элбэх киинэҕэ уһуллубута.
Ангелина Васильева, “Саха сирэ” хаһыат, edersaas.ru