Бэҕэһээ, кулун тутар 23 күнүгэр дойду бэрэсидьиэнэ Владимир Путин “Ковид-19” ыарыыны утары быһыыны ылла диэн пресс-сэкиритээрэ Дмитрий Песков иһитиннэрдэ. Бэрэсидьиэн туруга үчүгэй, бүгүн киниэхэ үлэ күнэ. Ол эрээри, чопчу ханнык быһыыны ылбытын чуолкайдаабата.
Урут бэрэсидьиэн быһыыны “сааһынан хааччахтааһынынан сибээстээн ылбаппын” диэн быһаарар этэ. Ааспыт сыл ахсынньытыгар доруобуйа харыстабылын министиэристибэтэ аҕам саастаах дьоҥҥо “Спутник V” быһыыны, кулун тутар ыйга “ЭпиВакКорона” быһыыны ылалларын көҥүллээбитэ.
Билиҥҥи туругунан, Арассыыйаҕа 6,3 мөлүйүөн киһи вакцина бастакы укуолун ылбыттар. Вакцинация тэтимнээхтик салҕанар.
Пандемия саҕаланыаҕыттан, бэрэсидьиэн элбэх дьонноох тэрээһиннэргэ сылдьарын, көрсүһүүлэри ыытарын аҕыйаппыта, мунньахтар видеокэмпириэнсийэ көмөтүнэн бараллара. Дьону кытары көрсөрүгэр илии тутуспакка, тэйиччиттэн сылдьан алтыһар ирдэбили тутуһара. Биллэн турар, бэрэсидьиэн дьаһалтатыгар кэлэр дьон бары анаалыс туттаран эрэ баран, киирэллэрэ. Холобур, “Ново-Огарево” резиденцияҕа дьону дезинфекциялыыр туннель баар буолбута диэн ТАСС иһитиннэрэр.
Ангелина Васильева, “Саха сирэ” хаһыат, edersaas.ru
Хаартыска: ykt.ru