Бэрэсидьиэн Владимир Путин пресс-кэмпириэнсийэтигэр 500 суруналыыс кыттыаҕа
Сарсын, ахсынньы 23 күнүгэр, дойду бэрэсидьиэнэ Владимир Путин суруналыыстары кытта көрсүөҕэ. Быйыл Арассыыйа Бэрэсидьиэнин улахан кэмпириэнсийэтэ 17-с төгүлүн ыытыллар. Бу сыллата ыытыллар тэрээһиҥҥэ 500-тэн тахса суруналыыс кыттыаҕа.
Быйыл кэмпириэнсийэ Москваҕа Манежка буолар. Биир улахан түһүлгэҕэ суруналыыстар мустан, дойду бэрэсидьиэнигэр ыйытыыларын биэриэхтэрэ. Биһиги өрөспүүбүлүкэбититтэн «Саха сирэ» хаһыат, edersaas.ru саайт суруналыыһа Аграфена Кузьмина, Саха информационнай ааҕыныстыбаттан Николай Борисов уонна «Саха» НКИХ кэрэспэдьиэнэ Айсен Бурнашева, оператор Виктор Олесов кыттыахтара.
Владимир Путин пресс-сэкирэтээрэ Дмитрий Песков иһитиннэрбитинэн, пресс-кэмпириэнсийэҕэ иностраннай агент реестригэр киирбит СМИ бэрэстэбиитэллэрэ эмиэ кытталлар.
Былырыын дьаҥынан сибээстээн тэрээһин уратылардаах ыытыллыбыта. Ол курдук, Владимир Путин суруналыыстары кытта видео-сибээһинэн Ново-Огарево баар резиденциятыттан кэпсэппитэ. Оттон быйыл суруналыыстар үс төгүллээн ПЦР-анаалыс туттарыахтара.
Былырыын тэрээһин 4 чаас 29 мүнүүтэ устата ыытыллыбыта. Аҕа баһылык уопсайа 60 ыйытыыга хоруйдаабыта. Оттон быйыл «быһа лииньийэ» уонна улахан преес-кэмпириэнсийэ туспа ыытыллыахтара.
Кэмпириэнсийэ хаамыытын саайтпытыгар сырдатыахпыт.
Хаартыска — sib.fm