Бэрэсидьиэн устудьуоннар үөрэхтэрин төлөбүрүн туһунан ыйытыыга хоруйдаата
Дойду бэрэсидьиэнэ Владимир Путин пресс-кэмпириэнсийэтин кэмигэр онлайн үөрэххэ, үөрэх хаачыстыбатыгар сыһыаннаах ыйытыы биэрдилэр. Тустаах боппуруоска сыһыаран, үөрэх төлөбүрүгэр эмиэ тохтоото.
Учуутал үөрэнээччини уун-утары көрөн олорон үөрэтэрин туох даҕаны солбуйбатын, ол эрээри, аан дойду билимин сырдатааччыларын истэр кыах бэриллэрэ үчүгэйин, күннээҕи үлэҕэ туохха эрэ атахтыан сөбүн ыйар. Итиэннэ очнай-дистанционнай систиэмэ ордугун этэр.
“Ол эрээри, өссө биир көрүү баар. Устудьуоннар онно болҕомтолорун ууралларын билэбин. Сороҕор, суукка кытта үҥсэллэр. “Биһиги олоҕурбут көрүҥүнэн үөрэтии иһин харчы төлөөбүппүт, оттон онлайн үөрэххэ сүнньүнэн, хаачыстыба түһэр” дииллэр. Кинилэр тугу этэллэрин өйдүүбүн. Ол гынан баран, мэтээл кэтэх өттө эмиэ баар. Преподаватель лиэксийэтин чааһын оффлайн да, онлайн даҕаны буоллун, син биир ааҕар. Тоҕо киниэхэ намыһах хамнас төлөнүөхтээҕий?” – диэн эттэ итиэннэ үрдүк үөрэх тэрилтэлэрин ороскуотун 70 бырыһыана хамнаска барарын иһитиннэрдэ. Эбэтэр сорох үрдүк үөрэх тэрилтэлэрин сабыахха наадатын, исписэлиистэр ордук киин куораттарга олус элбэх үрдүк үөрэх кыһалара бааллар диэн ыйалларын санатта.
“Ол эрээри, сүрүннээн үөрэх онлайн көрүҥүнэн ыытыллар, үбү-харчыны оонньотор кыахтаах үрдүк үөрэх тэрилтэлэрэ төлөбүр сууматын намтатыахтарын сөп буолуо. Эппитим курдук, быйыл судаарыстыба үрдүк үөрэх кыһаларыгар икки төгүллээн үбүнэн көмө оҥордо” – диэн эттэ.
Людмила ПОПОВА, “Саха сирэ” хаһыат, edersaas.ru