Бэлиитикэ

Бэрэсидьиэн Судаарыстыбаннай Дуума VIII ыҥырыытын бастакы мунньаҕын туһунан Ыйаахха илии баттаата

Бастакы мунньах алтынньы 12 күнүгэр буолуоҕа. Судаарыстыбаннай Дуума бэрэссэдээтэлэ Вячеслав Володин этэринэн, судаарыстыба баһылыга быһаарыытынан, саҥа ыҥырыллыбыт дьокутааттар талыллыбыттара 30 күн ааһарын кэтэспэккэ үлэлэригэр тахсалларыгар кыаҕы биэрэр диэн федеральнай парламент саайтыгар суруллар.

РФ бэрэсидьиэнэ Владимир Путин алтынньы 12 күнүгэр Судаарыстыбаннай Дуума ахсыс ыҥырыытын бастакы пленарнай мунньаҕа буоларын туһунан Ыйаахха илии баттаан биллэрдэ.

Бэрэсидьиэн быһаарыыта, саҥа ыҥырыллыбыт дьокутааттар талыллыбыттара 30 күн ааһарын кэтэспэккэ үлэлэригэр тахсалларыгар кыаҕы биэрэр. Күһүҥҥү сиэссийэҕэ инники күөҥҥэ — бүддьүөт. Ол Судаарыстыбаннай Дуумаҕа ырытыыта уонна барыыта чопчу болдьохтонон турар. Онон дьокутааттар төһөнөн эрдэ үлэлэригэр тахсаллар да, соччонон дойду үпкэ сүрүн докумуонун көрүүлэригэр элбэх бириэмэ баар буолуоҕа”, — диэн Судаарыстыбаннай Дуума бэрэссэдээтэлэ Вячеслав Володин бэлиэтээтэ. Оробуочай бөлөх мунньаҕа алтынньы 4 күнүгэр ыытыллыбыта.

Судаарыстыбаннай Дуума ахсыс ыҥырыытын бастакы пленарнай мунньаҕар бары тэрийэр уонна каадыр боппуруостарын быһаарыахтара. Бу туһунан дьокутааттар оробуочай бөлөхтөрүн быстах кэмнээх салайааччылара, Госдуума сэттис ыҥырыытын бэрэссэдээтэлин бастакы солбуйааччы Александр Жуков кэпсээтэ.

“Бу мунньахха ханнык боппуруостар ырытыллалларын быһаарсыбыппыт. Билэргит курдук, Судаарыстыбаннай Дуума бастакы мунньаҕын Судаарыстыбаннай Дуума фракцияларын саастаах бэрэстэбиитэллэрэ аһаллар уонна ыыталлар. Судаарыстыбаннай Дуума бэрэссэдээтэлэ, солбуйааччылара талыллар, кэмитиэттэр испииһэктэрэ уонна састааптара быһаарыллаллар, фракциялар бэлиэтэниини ааһаллар (регистрация), Судаарыстыбаннай Дуума күһүҥҥү сиэссийэтин үлэтин бэрээдэгэ итиэннэ кэккэ тиэхиньиическэй боппуруостар быһаарыллаллар”, — диэн Александр Жуков эттэ.

Ону тэҥэ, оробуочай бөлөх бэнидиэнньиккэ Судаарыстыбаннай Дуума ахсыс ыҥырыытын кэмитиэттэрин испииһэгин көрбүтэ. Быстах оробуочай бөлөх салайааччыта иһитиннэрэринэн, 32 кэмитиэти тэрийэргэ этиилээхтэр. Кинилэр испииһэктэрин фракцияларга, кэмитиэттэр састааптарыгар уонна салайар дуоһунастарга хандьыдааттарын быһаарыналларыгар киллэриллэр.

“Тэҥнэбил быһыытынан эттэххэ, билиҥҥи Судаарыстыбаннай Дуумаҕа итинник 26 кэмитиэт баар. Кэмитиэттэр ахсааннарын эбии, быстах кэмнээх оробуочай бөлөх этиитинэн, кэмитиэттэр тутулларын толоруулаах былаас федеральнай уорганнарын тутулларыгар төһө кыалларынан чугаһатар инниттэн этиллэр”, — диэн Александр Жуков чопчулуур.

Ол курдук, Экэнэмиическэй бэлиитикэҕэ, бырамыысыланнаска, инновационнай сайдыыга уонна урбааҥҥа кэмитиэти хас даҕаны чааска араарарга этиллибит: Экэнэмиичэскэй бэлиитикэ кэмитиэтигэр, Бырамыысыланнас кэмитиэтигэр, Антимонопольнай бэлиитикэ кэмитиэтигэр итиэннэ аччыгый уонна орто урбаанынан дьарыктанар кэмитиэккэ. Ону тэҥэ Физическэй култуура, спорт, туризм уонна ыччат дьыаларын кэмитиэтин араарыахтара. Александр Жуков иһитиннэрэринэн, Судаарыстыбаннай Дуума ахсыс ыҥырыытыгар Физическэй култуура уонна спорт кэмитиэтэ, Туризм кэмитиэтэ уонна Ыччат бэлиитикэтин кэмитиэтэ баар буолуохтаахтар.

Александр Жуков кэпсээбитинэн, оробуочай бөлөх Судаарыстыбаннай Дуума күһүҥҥү сиэссийэтин үлэтин кыраапыгын туһунан сүбэлэспит.

Быстах оробуочай бөлөх кэлэр мунньаҕа барыллаан алтынньы 8 күнүгэр буолуоҕа.

Салгыы СӨ Ил Дарханын уонна СӨ Бырабыыталыстыбатын саайтыгар ааҕыҥ.

Хаартыска РФ Судаарыстыбаннай Дуума Федеральнай Сэбиэтин саайтыттан.

0
0