Бүгүн, ахсынньы 17 күнүгэр, киэһэ 18.00 чаастан дойду Аҕа баһылыга Владимир Путин суруналыыстары кытта көрсүһүүтэ саҕаланыаҕа. Быйыл Арассыыйа Бэрэсидьиэнин улахан кэмпириэнсийэтэ 16-с төгүлүн ыытыллар. Бу сыллата ыытыллар тэрээһин быйыл улахан уратылаах буолуоҕа.
Былырыын хайдах ааспытай?
Былырыыҥҥы пресс-кэмпириэнсийэ кэмигэр бэрэсидьиэн 57 кэрэспэдьиэн ыйытыытыгар хоруйдаабыта. Тэрээһиҥҥэ 1 702 суруналыыс аккредитацияламмыта. ТАСС иһитиннэрбитинэн, Путин суруналыыстардыын сэһэргэһиитин 1,1 миллиард социальнай тиһиктэринэн туһанааччы интэриэһиргээбит, оттон тэлэбиидэнньэнэн биэриини Арассыыйа 6,7 мөлүйүөн олохтооҕо көрбүт.
Владимир Путин улахан пресс-кэмпириэнсийэни сыл аайы 2001 сылтан саҕалаан ыытар. 2005 сыллаахха, ону тэҥэ, Путин премьер-миниистирдээбит кэмигэр, 2009 сылтан 2011 сылга диэри эрэ ыытыллыбатаҕа.
Саамай улахан бастакы кэмпириэнсийэтэ балтараа чаас буолбута, бэрэсидьиэн суруналыыстар 20 ыйытыыларыгар хоруйдаабыта. Балачча уһун пресс-кэмпириэнсийэтэ 2008 сыллаахха буолбута. Ол 4 чаас 40 мүнүүтэ уһуннааҕа.
Былырыын Владимир Владимирович “киһи” диэн тылы 86-та туттубут, “ыйытыы” диэн тылы – 75-тэ. Үһүс миэстэҕэ “сыл” диэн тыл тахсыбыт. Бүгүн буоларга “коронавирус”, “ковид-19”, “пандемия”, “вакцина” уо.д.а тыллары элбэхтик туттуо диэн сабаҕаланар.
Быйыл хайдах ыытылларый?
Быйылгы тэрээһиҥҥэ 774 суруналыыс кыттыыны ылыаҕа, итилэртэн 237 — Москваттан.
Уустук балаһыанньанан сибээстээн, тэрээһин видео-кэмпириэнсийэ көрүҥүнэн барыаҕа. Путин видео-сибээскэ Ново-Огарево резиденциятыттан тахсара күүтүллэр, федеральнай уонна тас дойду СМИ-лэрэ уруккуттан кытта үөрүйэх Норуоттар икки ардыларынааҕы Эргиэн киинигэр үлэлиэхтэрэ
Эрэгийиэннээҕи суруналыыстар бэйэлэрин федеральнай уокуруктарыттан тахсыбакка эрэ бу тэрээһиҥҥэ кыттыахтара: кинилэргэ анал сирдэр тэриллиэхтэрэ, оттон кыттааччылар ахсааннара, Роспотребнадзор ирдэбиллэрин болҕомтоҕо ылан, хааччахтаах буолуоҕа.
Пресс-кэмпириэнсийэҕэ кыттарга анал сирдэр федеральнай уокуруктарынан тэриллиэхтэрэ: Киин — Москваҕа уонна Тулаҕа суруналыыстарга былаһаакка тэриллиэҕэ, Хотугулуу-Арҕааҥҥы – Санкт-Петербурга, Соҕурууҥҥу – Доннааҕы Ростовка, Хотугу Кавказ – Ставропольга, Волга өрүс устунааҕы – Аллараа Новгородка, Ураллааҕы – Екатеринбурга, Сибиирдээҕи – Новосибирскайга, Уһук Илиннээҕи – Владивостокка.
Уһук Илин 11 эрэгийиэниттэн Владивостокка 51 суруналыыс үлэлиирэ сабаҕаланар. Кинилэр «Ростелеком» дьиэтиттэн дойду аҕа баһылыгын кытта быһа сибээскэ тахсыахтара.
Родион Кривогорницын, Владивосток.