Дойду бэрэсидьиэнэ Владимир Путин пресс-кэмпириэнсийэтин кэмигэр ыраахтан олорон (дистанционно) үөрэнии үрдүк үөрэх тэрилтэлэригэр уонна оскуолаларга барыытын, хаачыстыбаҕа дьайыытын ыйыттылар.
Бэрэсидьиэн дойду үрдүнэн 39,9 тыһыынча оскуола баарын, итинтэн 2 %-на эрэ онлайн үлэлии олорорун, сорох чааһа очнай-дистанционнай, улахан аҥаардара олоҕурбут көрүҥүнэн (очно) үөрэтэллэрин эттэ.
“Биллэн турар, кыһалҕа баар. Көмпүүтэр тэрилэ киһиэхэ барытыгар баар буолбатах, интэриниэккэ холбонууга уустуктар бааллар. Тугу гынар былааннаахпытый? 2021 сылга Арассыыйа Федерациятын бары оскуолалара түргэн интэриниэккэ холбоноллоругар кыах бэриллиэхтээх. Сорох чааһын билигин хааччыйаллар, 2021 сылга салгыахтаахтар.
Икки төгүллээн үрдүк үөрэх кыһалара онлайн үлэлииллэригэр үбүлээһининэн (финансовай ресурса) өйөөбүппүт.
Онлайн көрүҥ үөрэнээччи, устудьуон, преподаватель быһаччы алтыһан үөрэниилэрин хаһан даҕаны солбуйар кыаҕа суох. Ол да буоллар, онлайн үөрэх туһаныллыаҕа. Систиэмэ баар, салгыы сайдыаҕа. Үрдүк кылаастаах, чопчу хайысхалаах исписэлиис хас даҕаны тэрээһиҥҥэ, үөрэх кыһаларыгар биир бириэмэҕэ кыттар кыаҕа суох. Чинчийэр үлэтиттэн даҕаны быыс булбат буолуон сөп. Оттон онлайн систиэмэнэн кыттыан сөп. Биллэн турар, маны туһаныахха наада. Бу олохпут сорҕотунан буолла, мантан куттанымыахха наада. Ол гынан, баран бу кыаҕын үлүннэрэр табыллыбат. Маассабай онлайн үөрэх олохпут тухары, мэлдьи киирбэтэ” – диэн быһаарда.
Онтон хаачыстыбаҕа учуутал оҕону, преподаватель устудьуону уун-утары көрөн туран үөрэппэт буолан, хайа эрэ өттүнэн дьайыан сөбүн ыйар.
Людмила ПОПОВА, “Саха сирэ” хаһыат, edersaas.ru
Хаартыска: Мария ВАСИЛЬЕВА (СИА)