Балаҕан ыйын 1 күнүттэн Арассыыйа бэрэсидьиэнин граннарын пуондата 2021 сылга сайаапкалары тутан саҕалаата. Бырайыак сайаапкатын алтынньы 16 күнүгэр диэри туталлар.
Бу кэмҥэ Ыччат дьыалаларыгар, социальнай коммуникацияларга министиэристибэ Ресурснай киини кытары сэминээрдэри ыытан, сүбэ-ама биэрэн көмөлөһүөхтэрэ.
Куонукурус усулуобуйата президентскиегранты.рф саайтка баар. Түмүгэ 2021 сыл тохсунньу 15 күнүгэр тахсыаҕа, үбүлээһинэ олунньуттан саҕаланыаҕа. Барыта 8 миллиард солкуобайы түҥэтиэхтэрэ.
2020 сылга үс куонкурус ыытыллыбыта, барыта 5319 бырайыагы 10,7 миллиард солкуобайынан өйөөбүттэрэ. Саха сириттэн бу күрэскэ сыллата көхтөөхтүк кытталлар. Министиэристибэҕэ иһитиннэрбиттэринэн, 2020 сылга 56 бырайыак кыайбыта, 61 мөлүйүөн 826 тыһыынча солкуобайы ылбыттара.
Сыл аайы пуонда 100 бастыҥ бырайыагы бэлиэтиир. 2018 сылга бу бастыҥнар истэригэр Саха сириттэн «Возрождение ЗОЖ в селе Таймылыр Булунского улуса Республики Саха (Якутия)» уонна «V Международная якутская биеннале современного искусства BY-18» бырайыактар киирбиттэрэ.
Ангелина Васильева, “Саха сирэ” хаһыат, edersaas.ru