Судаарыстыбаннай Дуума бэрэсидьиэн быыбарын күнүн көһөрөр туһунан сокуон барылын бастакы ааҕыыга көрдө.
Роман Попов, «Саха сирэ» хаһыат, https://edersaas.ru
Бэҕэһээ, муус устар 12 күнүгэр, Судаарыстыбаннай Дуума Арассыыйа бэрэсидьиэнин быыбарын 2018 сыл кулун тутар 11 күнүттэн 18-гар көһөрүүнэн, быыбары ыытыыны сүрүннүүр сокуоннарга уларытыылары киллэриини бастакы ааҕыыга ылынна. Бу докумуонунан “РФ бэрэсидьиэнин быыбарын туһунан” итиэннэ “РФ гражданнарын быыбардыыр бырааптарын уонна референдумҥа кыттыыларын сүрүн мэктиэлээһин туһунан” сокуоннарга уларытыылары киллэрии көрүллэр.
Билигин баар сокуонунан, РФ бэрэсидьиэнин быыбара кулун тутар ый иккис өрөбүлүгэр ыытыллар. Ону кытары, уларытыылары киллэриинэн, өскөтө кулун тутар ый иккис өрөбүлэ бииргэ холбоммут, бырааһынньык иннинээҕи биитэр бырааһынньык күнүн көһөрүүнэн үлэ күнүнэн ааҕылыннаҕына, быыбар күнэ ый үһүс өрөбүлүгэр сыҕарытыллан бэриллэрэ этиллэр.
Саҥа уларытыыларынан, РФ бэрэсидьиэнин быыбарыгар открепительнай дастабырыанньалары туттууну көтүрүү көрүллэр. Ол оннугар быыбардааччы, быыбар күн ханна баарынан, быыбар хамыыһыйатыгар испииһэккэ киллэрэллэригэр көрдөһөн сайабылыанньа суруйуон сөп. Сайабылыанньаны биэрии бэрээдэгин, болдьоҕун РФ Быыбарга киин хамыыһыйата быһаарыаҕа.
Маны сэргэ, быыбар учаастактарыгар кэтээн көрөөччүлэри анааһын туһунан балаһыанньаҕа көннөрүүлэр киллэриллиэхтэрэ диэн буолар. Ол курдук, холобура, кэтээн көрөөччүлэр испииһэктэрин туһааннаах хамыыһыйаҕа эрдэттэн ыытыы ууратыллыан сөп.
Административнай быраабы кэһии кодексыгар биир киһи хаста да куоластааһынын, бүлүтүөнү хаттаан биэрии иһин 30 тыһыынча солкуобайдаах ыстараабы олохтуурга этиллэр.
Роман Попов, «Саха сирэ» хаһыат, https://edersaas.ru