Бэрэсидьиэн Владимир Путин «Центризбирком” бэрэссэдэтэлэ Элла Памфилованы кытары видеонан мунньаҕын кэмигэр Арассыыйа олохтоохторо Судаарыстыбаннай Дуума быыбарыгар көхтөөхтүк кыттыбыттарын иһин махтанна.
Кини эппитинэн, быыбарга кыттыы 51,68% тэҥнэстэ, ол 2016 сылга буолбут быыбар көрдөрүүтүнээҕэр үрдүк.
— Ити дьон быыбарга эппиэтинэстээхтик сыһыаннаһар буолбуттарын көрдөрөр. Парламент үлэтиттэн дойду бигэ туруктаах буолара, сайдара, инники кэскилэ тутулуктаах. Судаарыстыбаннай Дуума ахсыс ыҥырыылаах дьокутааттара быыбардааччыларын итэҕэллэрин толорон, кыахтарын-күүстэрин, сыраларын харыһыйбакка, таһаарыылаахтык үлэлиэхтэрэ диэн эрэнэбин. Биһиги сыалбыт биир – Арассыыйаны сайыннарыы уонна гражданнар олохторун усулуобуйатын тупсарыы, — диэн Владимир Владимирович эттэ.
Ангелина Васильева, “Саха сирэ” хаһыат, edersaas.ru
Хаартыска: sakha.gov.ru