Быйыл Россияҕа Экология сыла саҕаланна. Итинэн сибээстээн, РФ айылҕа ресурсаларыгар уонна экологияҕа миниистирэ Сергей Донской “Российская газета” хаһыакка интервью биэрдэ. Онно миниистир айылҕа харыстабылыгар сыһыаннаах араас ыйытыыларга хоруйдаата. Женни Стрюкова, www.edersaas.ru
Тустаах министиэристибэ туһаҕынан бултааһын туһунан докумуону бэлэмнээбитин үгүс булчуттар истибит буолуохтаахтар. Ол эрээри бу докумуон айылҕаны харыстыыр уопсастыбанньыктар өттүлэриттэн улахан утарсыыны көрсүбүт. Уопсастыбанньыктар туһахха иҥнибит кыыл эрэйдэнэн-муҥнанан өлөрүн олох сөбүлээбэтэхтэрин туһунан эппиттэр-тыыммыттар. Миниистир Сергей Донской бастаан бэйэтэ эмиэ Булт департаменын санаатын кытта сөбүлэспэтэх. Онтон уопсастыбаннай сэбиэккэ дьүүллэһэн баран, туһаҕынан бултуохха сөп диэн санааҕа кэлбиттэр. Бэл, Россияҕа Ийэ айылҕа фондата кытта туһах иитэн бултааһыны утарбатах.
— Тоҕо туһаҕынан бултааһыны сөргүтэ сатыыбытый? Адьырҕа бөрө ахсаанын аччатаары. Холобур, аҥаардас Саха сиригэр бөрөлөр 2 сыл устата 20 тыһыынча дьиэ табатын уонна 500 сыспай сиэллээҕи сиэтилэр. Бөрө оҥорор хоромньута сылга 16 млрд солкуобайга тэҥнэһэр. 30 сыллааҕыта бөрө ахсаана 25 тыһыынча буоллаҕына, билигин 55 тыһыынчаҕа тиийдэ, — диэтэ Сергей Ефимович.
Кини салгыы, сэбиэскэй кэмҥэ сур бөрөнү бултааһыҥҥа бөртөлүөтүнэн көтүүлэри тэрийии, булчуттарга оччотооҕу харчынан хас биирдии өлөрбүт бөрөтүн иһин 200 солкуобайы төлүү сылдьыбыттарын холобурдаата.
Быһата, туһах иитэр көҥүл буолбут диэн баран, туох кыыл түбэһэринэн бултуур табыллыбат эбит. Онон аҥаардас бөрөнү ахсаанын аччатаары булт быраабылатыгар бу көннөрүүлэри киллэрбиттэр. Уонна бөрөҕө туһахтыырга көҥүлү анал биригээдэ эрэ ылар кыахтаах, чааһынай киһиэхэ бэриллибэт. Көҥүлэ суох булчуту улахан ыстараап күүтэр.
Саха сиригэр Абыйга, Аллайыахаҕа, Анаабырга, Булуҥҥа, Үөһээ Халымаҕа, Дьааҥыга, Эдьигээҥҥэ, Муомаҕа, Аллараа Халымаҕа, Өймөкөөҥҥө, Өлөөҥҥө, Орто Халымаҕа, Усуйаанаҕ , Эбээн-Бытантайга эрэ бөрөнү бултуур анал биригээдэ туһахтыыра көҥүллэнэр.
Женни Стрюкова, www.edersaas.ru