Бэрдьигэстээххэ «Манчаары оонньууларыгар» Арассыыйа успуордун миниистирэ ыалдьыттыыр
«Манчаары оонньууларыгар» бүгүн, от ыйын 7 күнүгэр, Арассыыйа успуордун миниистирэ Олег Матыцин ыалдьыттыыр. Кинини кытта Арассыыйа олимпийскай кэмитиэтин бэрэсидьиэнэ Станислав Поздняков кэллэ.
Бочуоттаах ыалдьыттар «Спорт — норма тур» бырайыак өрөспүүбүлүкэҕэ үөрүүлээх арыллыытыгар кытыннылар. Бу федеральнай таһымнаах бырайыак быйыл дойду тоҕус куоратыгар олохтоохтору көхтөөх олоххо ыҥырыаҕа, успуорка угуйуоҕа.
Миниистир Олег Матыцин: «Манчаары оонньуулара» саҕаламмытынан эҕэрдэлиибин! Дьаҥ турбутун да үрдүнэн, өрөспүүбүлүкэ Ил Дархана уонна бырабыыталыстыба маннык хорсун быһаарыныыны ылынаннар, тэрээһин ыытан эрэҕит. Онон бу тэрээһининэн кыайыыга сатабылбытын, дойдубутунан киэн туттар баҕабытын көрдөрүөхпүт диэн эрэнэбин. Бүгүҥҥүттэн саҕаламмыт олимпийскай уонна паралимпийскай хамаандалары өйүүр «Спорт — норма тур» бырайыак спортсменнарга уонна тириэньэрдэргэ сөптөөх энергетиканы оҥороллорун саарбахтааабаппын», — диэн эҕэрдэ тылын эттэ уонна судаарыстыбаннай наҕараадалары туттарда.
Оттон Олимпиада түөрт төгүллээх чөмпүйүөнэ, Арассыыйа олимпийскай кэмитиэтин бэрэсидьиэнэ Станислав Поздняков: «Олимпийскай кэмитиэт аатыттан «Манчаары оонньууларын» кыттыылаахтарын эҕэрдэлиибин, ситиһиини баҕарабын. Токиотааҕы Олимпиадаҕа эмиэ маннык курдук көхтөөхтүк уонна истиҥник биһиги спорстменнарбытыгар бары бииргэ ыалдьыахпыт диэн эрэнэбин,» — диэн эттэ уонна өрөспүүбүлүкэҕэ олимпийскай хамсааһын, физическэй култуура сайдарыгар кылаатын уурбут Афанасий Алексеевы кэмитиэт бочуоттаах грамотатынан наҕараадалаата. Афанасий Егоровичы успуорт бэтэрээнэ, «Манчаары оонньууларын» төрүттээччи киһинэн буолар. Онуоха Афанасий Алексеев: «Номох буолбут киһи илиититтэн маннык үрдүк наҕарааданы ылбыппын хаһан даҕаны умнуом суоҕа», — диэн үөрэн-көтөн туран махтанна.
Аны аҕыйах чааһынан Бэрдьигэстээххэ «Чыпчаал» стадиоҥҥа «Манчаары оонньууларын» үөрүүлээх арыллыыта ыытыллыаҕа.
Айтана Аммосова, edersaas.ru