Горнай улууһугар Бэрдьигэстээххэ ытар тиир комплекса аһылынна. Онон өрөспүүбүлүкэ бары муннуктарыттан спортсменнар кэлэн, буулдьанан, ох саанан, пневматическай ытыыга эрчиллиэхтэрэ, маастарыстыбаларын чочуйуохтара.
Бу икки этээстээх эбийиэк 3600 кв.м. иэннээх, аныгы тэриллэринэн толору хааччыллыбыт, үөрэтэр кылаастардаах уонна киэҥ-куоҥ эрчиллэр саалалардаах. Тиир аттыгар миэбэллээх, анал тэриллэрдээх уопсай дьиэ тутуллубут. Манна өрөспүүбүлүкэтээҕи спортивнай оскуолаттан оҕолор кэлэн, үрдүгэр олорон эрэ, эрчиллиэхтэрэ, үөрэниэхтэрэ.
Эбийиэги арыйыыга уонна Н.Лукин аатынан чөмпүйэнээт саҕаланыытыгар Ил Дархан Айсен Николаев кытынна.
— Саха сирин успуордугар ураты суолталаах түгэн үүннэ – ытыыга бастакы анал спортивнай комплекс арылынна. Өрөспүүбүлүкэбит 100 сылыгар арыллыбыта икки бүк үөрүүлээх. Бу маннык бэртээхэй спортивнай комплекстар элбээн истэхтэрин ахсын, успуорт сайдыыта бигэ тирэхтэнэр. Горнай улууһа ытааччыларынан аатырар, онон чуолаан манна ытар комплекс тутуллубутуттан үөрэбин. Өрөспүүбүлүкэҕэ ытар успуорт сайдыытыгар олук уурулунна, саҥа чаҕылхай “сулустар” тахсан иһэллэригэр эрэнэбин, — диэн кини эттэ уонна саҥа комплекска 500 тыһыынча солкуобайдаах сэртипикээти бэлэхтээтэ.
Горнай улууһуттан Николай Лукин, Кристина Устинова курдук бэртээхэй ытааччылар, чаҕылхай спортсменнар тахсыбыттара.
Видеоҕа анал устууну көрүҥ.
Ангелина Васильева, “Саха сирэ” хаһыат, edersaas.ru
Хаартыска:СИА.