Бэрдьигэстээххэ «Вызов — кузов» экологическай аахсыйаҕа уон сыарҕа тимири тиэйдилэр

Горнай улууһугар Үлэ сылын чэрчитинэн тэрээһиннэр тиһиктээхтик салҕаналлар. Соторутааҕыта «Вызов — кузов» экологическай аахсыйа буолла. Бу туһунан улуус дьаһалтатын пресс-сулууспата иһитиннэрдэ. 

— Аахсыйаҕа Горнай улууһун баһылыга Никита Андреев, улуус баһылыгын бастакы солбуйааччы  Юрий Алексеев,  улуус, нэһилиэк дьаһалталарын кэлэктииптэрэ, «Амгор» суолу тутар тэрилтэ үлэһиттэрэ, уо.д.а. көхтөөхтүк кытыннылар.

Бэрдьигэстээх нэһилиэгэр  «Сэргэлээх» түөлбэтигэр быраҕыллыбыт эргэ массыына сыарҕаларын, тимирдэри Николай Бельды салайар тэрилтэтин икки самосвал масыынатынан, уопсайа уон сыарҕаны тиэйдилэр. Хомуллубут  тимирдэри  урбаанньыт  Алексей Павлов базатыгар илдьэн сүөкээтилэр. Алексей Христофорович тимири  хомуйуунан, туттарыынан уонна туһаҕа таһаарыынан дьарыктанар.

Манна даҕатан эттэххэ, улууспутугар бөҕү арааран туспа тоҕуу олоххо киирэр. Маныаха кумааҕыны хос оҥорон таһаарыыга хаһыс да сылын  урбаанньыт Андрей Михайлов ылсан үлэлэһэр.  Кини туттуллубут А4 кумааҕыттан туалетнай кумааҕыны оҥорор. Онон тулалыыр эйгэни харыстыыр сыалтан, бөҕү арааран, хос оҥорон таһаарар ньыма киирэн иһэрэ биһигини үөрдэр, — диэтилэр.

«Вызов—кузов» аахсыйаны Горнай улууһун полициятын отделениетыгар (нач.Нь.Н.Олесов) уонна «XXI  Манчаары оонньуулара» спартакиаданы  ыытарга эстафетаны биэрбит  ыаллыы сытар Үөһээ Бүлүү улууһун дьаһалтатыгар (баһ.В.С.Поскачин) салгыырга ыҥырыы оҥордулар. Итиэннэ улуус олохтоохторун бөһүөлэктэрин ырааһырдыыга көхтөөхтүк кытталларыгар, түөлбэлэринэн тааһы, маһы, пластигы, тимири, бөҕү-саҕы биир сиргэ мунньан баран улуус  эбэтэр нэһилиэк дьаһалталарыгар биллэрэллэригэр эттилэр.

Биһиги корр., «Саха сирэ» хаһыат, edersaas.ru