Горнай улууһугар, Бэрдьигэстээххэ, успуорт комплекса тутулла турар.
Үүнэр 2021 сылга ыытыллыахтаах «Манчаары оонньуулара» успуорт национальнай көрүҥнэрин XXI спартакиадатыгар анаммыт тутуу 72% бэлэм. Үлэ кыраапыгыттан хаалыы суох.
Икки мэндиэмэннээх, киэҥ-куоҥ саалалаах дьиэҕэ 400 киһи киирэн олорон эрэ волейболу, мини-футболу, баскетболу көрүөҕэ. Онтон да атын анал хостор былааннаммыттар. Бэдэрээччит «АЭБ Капитал» ХЭУо.
Успуорт саалатын үрдүгэ 8 миэтэрэ, иэнэ 1260 кв.м. Бу улахан эбийиэк «Демография» национальнай бырайыак иитинэн тутуллар, дойду хааһынатыттан 168 мөл.солк. үбүлэнэр. Билигин бу тутууга сылаас бэриллибит, муостата оҥоһуллубут. Онон ис бараанын, быыстарын оҥорууга ылсыбыттар. Үлэ бүтүүтүгэр сирин-уотун тупсарыыга түһүнүөхтээхтэр.
«Быйыл тутуу тэрилтэлэригэр судургута суох сыл буолла. Ол да буоллар, эбийиэктэр болдьоммут кэмнэригэр түмүктэнэллэригэр болҕомто ууруллар, сыал-сорук туруоруллар», — диэтэ «СӨ судаарыстыбаннай сакаасчыт сулууспата» хааһына генеральнай дириэктэрин солбуйааччытын э.т. Михаил Черов.
+1
+1
+1
+1
+1
+1
+1