Бэрдьигэстээххэ улахан саахалга эмсэҕэлээбит 197 киһиттэн 188-һа дьиэтигэр киирдэ

Горнай улууһун киинэ Бэрдьигэстээх сэлиэнньэтигэр тахсыбыт улахан саахалы туоратыы үлэтэ күн аайы график быһыытынан ыытылла турар. Б.дь. тохсунньу 31 күнүн сарсыарда 6 чаастааҕы туругунан, тоҥмут 30 дьиэттэн 24-гэр ититии киирдэ. Онон аймахтарыгар  көспүт 197 киһиттэн, ол иһигэр 59 оҕо  188 киһи 59 оҕо бары дьиэлэригэр ититии киирэн, төннөр кыахтанан үөрдэ-көттө.

Хочуолунайга баһаар буолан тоҥуу-хатыы тахсыбытын туоратар үлэ баран, 18 тэрилтэттэн 10 бүгүн толору эрэсииминэн үлэлиир кыахтанна.

Күүтүллүбэтэх улахан саахалы туоратыыга СӨ Ил Дархана Егор Борисов, бырабыыталыстыба бэрэссэдээтэлэ Евгений Чекин, манна сыһыаннаах тэрилтэлэр бары күүс-көмө буолан, чөлүгэр түһэрэр үлэ түүннэри-күннэри тохтоло суох ыытыллан, бүтэр уһуга көстөн эрэр.

Чугастааҕы улуустар дьиэ-уот коммунальнай хаһаайыстыбаларын кэлэктииптэрэ анал өрөмүөннүүр биригээдэлэри ыытан, үлэ түргэтииригэр улахан кыахтары үөскэттилэр. Ол курдук, Хаҥалас, Мэҥэ Хаҥалас, Сунтаар, Ньурба, Үөһээ Бүлүү, Бүлүү улуустарыттан анал идэтийбит өрөмүөннээччилэр кэлэн үлэлэһиилэрэ, бу бөдөҥ тэрилтэ маннык тыын суолталаах проблеманы, соһуччу үөскээбит уустуктары быһаарыыга күүстээх дьаһаллааҕын, түмсүүлээҕин көрдөрөр.

Олохтоохтор салалтаттан саҕалаан оҕотугар тиийэ, бу үлэ түргэтииригэр, хаачыстыбалаахтык оҥоһулларыгар, ис тэрээһинигэр кыаллары барытын оҥороллор, көмөлөһөллөр, өйүүллэр. Ыччат, оскуола үөрэнээччилэрэ бытарҕан тымныыттан чаҕыйбакка, олорон-туран көрбөккө, күнү-түүнү араарбакка эргиччи үлэлии сылдьааччыларга итии чэй, кофе аҕалан биэрэллэрэ — махтаныы биир көрүҥэ дии саныыгын.

Василий Алексеев, «Үлэ күүһэ» эрэдээктэрэ, Василий Тимофеев хаартыскаҕа түһэриилэрэ, edersaas.ru