Бу күннэргэ өрөспүүбүлүкэ улуустарыгар Улуу Кыайыы 75 сылынан сибээстээн, Аҕа дойду Улуу сэриитин кэмигэр номоххо киирбит Т-34 тааҥкалары олохтоохтор бэйэлэрэ таҥан туруоран эрэллэрин сырдата олоробут.
edersaas.ru
Биир оннук Аҕа дойду Улуу сэриитигэр Кыайыыны уһансыбыт Т-34 тааҥка пааматынньыга бүгүн Горнай улууһун Бэрдьигэстээҕэр турда.
Уһанар талааннаах маастар Захар Павлов төрөөбүт Горнайыгар эргэ тиэхиньикэни чөлүгэр түһэрэн, киһи билбэт гына оҥорорунан аатырар.
Ол курдук, кини 21 массыынаны уонна 8 матасыыкылы таҥыыта – олоҕун түөрт уон сылын тимири иһэрдиигэ анаабытын туоһута. Бары үлэлиир кыахтаах тиэхиньикэлэр — собуоттаа да олор, айаннаа! Кини сэрии кэминээҕи «ГАЗ» массыыната Кыайыы параадыгар үгэс быһыытынан инники күөҥҥэ иһэн, сэлэлээн хаамыыны аһар.
Захар Егорович уолунаан Георгий Павловтыын Улуу Кыайыы 75 сылын көрсө таҥмыт тааҥкалара «Историческай пааматынньыгы оҥорууга бастыҥ уопсастыбаннай көҕүлээһин» номинация кыттыылааҕа.
Бэрдьигэстээх нэһилиэгин баһылыга Марк Парфенов пааматынньыгы үтүктэн оҥорууга матырыйаалынан хааччыйан улаханнык өйөөтө. Онно эбии Бэрдьигэстээх уонна Кировскай нэһилиэгин олохтоохторо көмөлөстүлэр.
Дэгиттэр уус ретро-тиэхиньикэтинэн мусуой оҥорор санаалаах. Улуус дьаһалтатын пресс-киинэ иһитиннэрэринэн, 2021 сылга өрөспүүбүлүкэ улуустарыттан «Манчаары оонньууларыгар» 10 000 ыалдьыт кэлэрэ сабаҕаланар. Онон Захар Павлов историческай хайысхалаах үлэлэрэ, биллэн турар, улуус биир бастыҥ интэриэһин тардар мусуой эспэнээттэринэн буолаллара саарбаҕа суох.
Албан аат, Өйдөбүнньүк уонна Дойдуга бэриниилээх буолуу сылларыгар Бэрдьигэстээх олохтооҕо, Горнай улууһун Бочуоттаах гражданина Захар Павлов патриот быһыытынан бэйэтин дьоһуннаах бэлэҕин — Т-34 тааҥка пааматынньыгын Улуу Кыайыы 75 сылынан сибээстээн биир дойдулаахтарыгар утары уунна.
Елена ПОТОЦКАЯ, «Cаха сирэ» хаһыат, edersaas.ru
Хаартыскаҕа Виктор Семенов түһэриитэ.