Бүгүн, от ыйын 7 күнүгэр, Горнай улууһун Бэрдьигэстээҕэр XXI төгүлүн ыытыллар «Манчаары оонньууларын» үөрүүлээх арыллыытын сиэрэ-туома ыытылынна.
«Манчаары оонньуулара» успуорт национальнай көрүҥнэригэр спартакиада арыллыытын үөрүүлээх чааһа Горнай улууһа төрүттэммитэ 90 сылыгар уонна бу улуустан төрүттээх ини-бии Герман, Александр Контоевтар көҥүл тустууга аан дойду чөмпүйэнээтигэр өрөгөйдөөбүттэрин 20 сылыгар ананна.
Арыллыы кэмигэр күрэхтэһии сүрүн судьуйата Семен Говоров уонна кыттааччылар ааттарыттан «Дыгын оонньууларын» биэс төгүллээх чөмпүйүөнэ Егор Филиппов бэйэ-бэйэҕэ убаастабыллаахтык илин-кэлин түсүһэргэ, чиэһинэй күрэхтэһии ааһарыгар андаҕайдылар. Бу кэнниттэн «Чыпчаал» стадиоҥҥа хамаандалар парааттара саҕаланна. Оонньууларга барыта 40 хамаандаттан 1899 спортсмен кыттыаҕа, 174 мэтээл кэмпилиэгэ оонньонуоҕа.
«Манчаары оонньуулара» улууска уустук эпидемиологическай балаһыанньанан уонна өрөспүүбүлүкэҕэ коронавируһу утары быһыыны ылыы тэтимэ бытаанынан сибээстээн, тэрийэр кэмитиэт күрэхтэһиини көрөөччүтэ суох ыытарга быһаарыныыны ылыммыта. Онон арыллыы сиэрин-туомун успуорт сүгүрүйээччилэрэ тэлэбиисэринэн көрдүлэр.
СӨ бырабыыталыстыбатын бэрэссэдээтэлин солбуйааччы Сергей Местников оонньуулары тэрийэр кэмитиэт аатыттан рапорыгар: «Тэрийэр кэмитиэт бары хайысханан улахан үлэни ыытта. Бэрдьигэстээххэ улахан тутуулар ыытылыннылар: тир, стадион, элбэх хайысхалаах успуорт комплекса, ипподром, олорор дьиэлэр, суол үлэтэ уо.д.а.», — диэн бэлиэтээтэ.
«Чыпчаал» стадиоҥҥа спартакиада былааҕын өрөспүүбүлүкэ инники күөҥҥэ сылдьар спортсменнара өрө тутан киллэрдилэр: марафон сүүрэр Наталья Леонтьева, гиирэ анньааччы Владимир Оленов, мас тардыһыык Наталья Черноградская, хапсаҕайдьыт, тустуук Евгений Алексеев, ыстаҥаһыт Кай Адамов уонна многоборец Георгий Софронов.
Өрөспүүбүлүкэ Ил Дархана Айсен Николаев «Манчаары оонньууларын» арыллыбытынан аахта уонна: «Сахам сирин бар дьоно, ытыктабыллаах Горнай улууһун олохтоохторо, ыалдьыттар, успуорт бэтэрээннэрэ, XXI төгүлүн ыытыллар «Манчаары оонньууларын» арыллар күнүнэн итиитик-истиҥник эҕэрдэлиибин. Тэрийээччилэргэ, спонсордарга, волонтердарга баһаары, пандемияны, түүнү-күнүһү аахсыбакка тэрийбиккитигэр махтанабын», — диэтэ. Маны кытта Айсен Сергеевич мас тардыһыыта олимпийскай көрүҥ буолуо диэн эрэллээҕин эттэ
Күрэхтэһээччилэри успуорт бырааһынньыга саҕаламмытынан Арассыыйа успуордун миниистирэ Олег Матыцин, олимпийскай кэмитиэтин бэрэсидьиэнэ Станислав Поздняков уонна Горнай улууһун баһылыга Никита Андреев эҕэрдэлээтилэр.
Салгыы П.А. Ойуунускай аатынан Саха академическай тыйаатырын сүрүн режиссера Руслан Тараховскай бэлэмнээбит театрализованнай туруоруута саҕаланна. Манна Саха тыйаатырын, Кыыл Уолун аатынан Үҥкүү национальнай тыйаатырын, судаарыстыбаннай цирк, Олоҥхо тыйаатырын, Г.М. Кривошапко аатынан судаарыстыбаннай филармония, ХИФУ айар кэлэктииптэрин, «Кыталык» үҥкүү ансаамбылын артыыстара кыттыыны ыллылар. Үөрүүлээх тэрээһиҥҥэ Горнайтан төрүттээх норуодунай суруйааччылар Семен уонна Софрон Даниловтар айымньылара төрүөт буолан, кэскиллээҕи анаарыыны, сайдыыны уонна олохпутугар айти-технологиялар кимэн киириилэрин киэҥник көрдөрүлэр.
“Манчаары оонньууларын” арыйар факеллаах уоту от ыйын 4 күнүгэр Мэҥэ Хаҥалас улууһугар Манчаары төрөөбүт Арыылаах алааһыгар умаппыттара. Уоту туппутунан, уон киһилээх бөлөх эстафеталаан сүүрдүлэр. Эстафета уотун Саха сиригэр чөл олоҕу тарҕатааччы, физическэй култуура уонна успуорт үтүөлээх үлэһитэ, экстремал сүүрүүк Дмитрий Горохов уонна Саха АССР уһуну сүүрүүгэ уон төгүллээх чөмпүйүөнэ, успуорт маастара Афанасий Илларионов салайдылар. Бөлөх түөрт күн устата 280 км уҥуордаан, “Манчаары оонньууларын” арыллыытыгар кэллилэр.
Арыылаах алаастан сүүрэн кэлбит эстафета факелы стадиоҥҥа Манчаары буолан маҥан атынан көтүтэн киирбит көҥүл тустууга норуоттар икки ардыларынааҕы успуорт маастара, аан дойду чөмпүйүөнэ Герман Контоевка туттарда. Салгыы уот эстафетатын ыстаҥаһыт Диана Адасько, тустуук Василий Пахомов, хотугу многоборец Илона Винокурова, ыстаҥаһыт Иван Пестряков, мас тардыһыык Дьулустаан Ноговицын, хапсаҕайдьыт, тустуук Олег Чернов уонна мас тардыһыык Айталина Колодезникова тутан, «Чыпчаал» стадиону эргийдилэр. Оттон оонньуулар уоттарын көҥүл тустууга аан дойду чөмпүйэнээтин боруонса призера Александр Контоев уматта.
«Манчаары оонньуулара» бүгүҥҥүттэн номнуо саҕаламмыттара. “Саха” НКИХ, “Мамонт” ханаалларыгар, yk24.ru уонна nvk-online.ru саайтарыгар, итиэннэ Samsung, LG тэлэбиисэрдээхтэргэ Smart TV сыһыарыыга, “Саха” НКИХ мобильнай сыһыарыытыгар быһа эпииргэ көрүөххэ сөп.
Мария Васильева (СИА) хаартыскалара.