Баһаар буолбут түүн куораттан атын модульнай хочуол аҕалбыттара.
Дьону кытта үлэ
Вице-премьер Алексей Колодезников тоҥмут дьиэлээхтэри барыларын кытта быһаччы сибээһи тутуһан олорорго сорудахтаабыта. Ону сэргэ энергетиктэр уот бэриллиитин хонтуруоллуулларыгар, баһаарынайдар ыалларынан сотору-сотору кэрийэн көрөллөрүгэр дьаһайда.
Үлэни «ДьУОКХ» ГУП кылаабынай инженерэ В.В.Бондарь салайа сылдьар. Тэрилтэлэргэ дьурууһустуба олохтонно. Бырабыыталыстыба бэрэссэдээтэлэ Евгений Чекин ыыппыт мунньаҕар сүрүн иһитиннэриини А.З. Колодезников оҥорбута. Кини кэннэ эйгэлэр салайааччылара үлэлэрин билиһиннэрдилэр.
Эвакопуун
Бэрэссэдээтэл ЕвгенийЧекин баһаарынай сулууспа үлэһиттэрэ нэһилиэнньэҕэ сөптөөх иһитиннэриини, сэрэтиини күүскэ ыыталларыгар, полиция өттүттэн патруллааһын, көрүү-истии күннэри- түүннэри олохтоноругар сорудахтаата.
Эвакопууҥҥа тиийбит дьоннор аһылыктарын, сухой паегу, утуйар таҥастарыгар диэри тэрийиэхтэрэ.
Тастан кэлэн үлэлиэхтээх биригээдэни түһэриигэ 50-ча миэстэ интернакка бэлэмнэнэн турар.
Силиэстийэ эрэ кэннэ
Силиэстийэ үлэтин кэнниттэн эрэ чөлүгэр түһэрии үлэтэ саҕаланыахтаах. Баһаар тахсыбыт төрүөтэ, буруйдаахтар онно биллиэхтэрэ. Хочуолунайдар бэйэлэрэ уокка алдьамматах буолуохтарын сөп диэн испэсэлиистэр быһаараллар. Уотун оборудованиета, носуостара о.да. барыта уокка былдьаммыттар.
Таксистар босхо тастылар
Бэрэссэдээтэл олохтоох салалта, сөптөөх үлэни ыытарын, нэһилиэнньэ түмсүүлээҕин бэлиэтээн туран, дьону босхо таспыт таксистарга, аһы босхо биэртэлээбит урбаанньыттарга, түүннэри- күнүстэри үлэлии сылдьар коммунальнай хаһаайыстыба үлэһиттэригэр махталын биллэрдэ.
Мунньах кэнниттэн тута хочуолунайы чөлүгэр түһэрии үлэтин, атын хочуолунайтан саҥа трасса тарда сылдьааччылары көрдө- иһиттэ, кэпсэттэ.
Уопсай дьиэлэргэ сырытта, эвакопууннар үлэлэрин билистэ. Горнай улууһун баһылыга Никита Андреев бары үлэҕэ быһаччы кыттар, балаһыанньаны хонтуруолга тутар.
Василий АЛЕКСЕЕВ,«Үлэ күүһэ» хаһыат эрэдээктэрэ.
Горнай улууһа.