Быйылгы сылы Горнай улууһун Бэрдьигэстээх сэлиэнньэтин баһылыга Алексей Аргунов ыал аҕатын оруолун үрдэтэр сыалтан Аҕа сылынан биллэрбитэ.
Онон өрөспүүбүлүкэҕэ ыытыллар Ийэ сылын кытта Бэрдьигэстээххэ Аҕа сыла биллэриллэн дьиэ кэргэн олоҕун тупсарыыга өйөбүл да, болҕомто да ууруллуоҕа. Суолталаах тэрээһиннэри көҕүлүүр соруктаах бу күннэргэ актыбыыс аҕалар дьаһалта аактабай саалатыгар көрсөн, үлэ былаанын дьүүллэстилэр.
Тэрээһиҥҥэ 12 киhи кыттыыны ылан, биир сүбэнэн Бэрдьигэстээх Аҕаларын түмсүүтүн салайааччытынан оҕо иитиитигэр өр сылларга үлэлээбит, тиэхиньикэҕэ сыһыаннаах, айар-тутар дьоҕурдаах, үс оҕолоох сис ыал аҕа баһылыгын Валерий Дьячковскайы таллылар.
Аҕалар түмсүүлэрэ быһааръбытынан, бастакы улахан тэрээһин кулун тутар 8 күнүгэр аан дойдутааҕы Дьахтар күнүгэр ананыаҕа. Маны тэҥэ чөл олоххо көҕүлүүр спортивнай, маассабай күрэхтэһиилэр сыл устата ыытыллыахтара.
Аҕалар сэлиэнньэ хас биирдии оскуолатын иһинэн Аҕа түмсүүтэ баар буоларын ситиһиэхтэрэ.
Буруй тахсыыларын аччатыыга кэккэ үлэ былаана торумнанна. Ураты болҕомто нэһилиэк соҕотох аҕаларыгар ууруллуоҕа. Бэрдьигэстээх аҕаларын, сааһыттан тутулуга суох, бу түмсүүгэ көхтөөхтүк киирэллэригэр үлэ ыытыллыаҕа. Онон Ийэ сылын кытта тэҥҥэ бэрдьигэстээхтэр Аҕа сылын биллэрэн, дьиэ кэргэн олоҕун уйгута тупсарын туһугар үлэни көхтөөхтүк тэрийиэхтэрэ.
Бу туһунан олохтоох дьаһалта бэйэтин инстаграмыгар сырдатта.
Елена ПОТОЦКАЯ, “Саха сирэ” хаһыат, edersaas.ru
Хаартыска — олохтоох дьаһалта инстаграмыттан.