Кулун тутар 27 күнүгэр Горнай улууһун Бэрдьигэстээҕин олохтоохторугар күүтүүлээх, кэтэһиилээх өрөгөйдөөх күннэрэ үүннэ.
Ол курдук, ааспыт үйэ 90-с сылларыттан туруорсубут, күүтүүлээх күөх төлөн уота биирдиилээн ыаллар дьиэлэригэр киирэн, сылааһынан сыдьаайда. Бэлиэ тэрээһиҥҥэ олохтоохтор үөрүүлэрин Ил Дархан Айсен Николаев, “Сахатранснефтегаз” АУо генеральнай дириэктэрэ Алексей Колодезников, улуус баһылыга Никита Андреев үллэһиннилэр диэн @silatrudagorny иһитиннэрдэ.
— Мин гааска саҥа холбоммут олорор дьиэлэргэ сылдьан, олохтоохтору кытары көрүстүм. Бу мас мастаан, күнү быһа оһох оттор тыа сирин олохтоохторугар улахан үөрүү. Тыа сирин кэлимник сайыннарыы федеральнай бырагыраамаҕа олоҕуран, Бэрдьигэстээххэ 750 дьиэ гааска холбонор кыахтанна. Улуус киинэ тупсан иһэр. Саҥа тутуу күүскэ ыытыллар. 50 миэстэлээх тир тутуун хаамыытын билистим. Бу сылга Бэрдьигэстээххэ Манчаары оонньуулара ыытыллыаҕа. Оонньууларга бэлэмнэнии тэтимнээхтик ыытыллар, — диэн Ил Дархан иһитиннэрдэ.
edersaas.ru
@silatrudagorny хаартыскалара