Захар Павлов төрөөбүт Горнай улууһугар эргэ массыына тиэхиньикэтин чөлүгэр түһэрээччинэн биллэр. Билигин Захар Егорович Улуу Кыайыы 75 сылын көрсө номоххо киирбит Т-34 тааҥканы таҥарга быһаарынна, диэн ЯСИА улус.медиаҕа олоҕуран иһитиннэрэр.
Захар Павлов олоҕун түөрт уон сылын тимири иһэрдиигэ анаата. Кини Бэрдьигэстээххэ олорор уонна эргэ тиэхиньикэни чөлүгэр түһэриинэн дьарыктанар: билигин кини тиэргэнигэр чөлүгэр түспүт 12 ретро-массыына уонна 5 матасыыкыл турар. Дэгиттэр уус Горнай олохтоохторугар анаан мусуой оҥорор баҕалаах. Маастар манан уоскуйар санаата суох – араас алдьаныылаах-кээһэниилээх сэттэ массыына Захар Егорович уонна кини уола Георгий инструменнарын ылан, хаһан оҥороллорун кэтэһэр.
Биирдэ Бэрдьигэстээх нэһилиэгин баһылыга Марк Парфенов Павловтарга аатырбыт Т-34 тааҥканы үтүктэн оҥороллоругар этии киллэрбитэ. Бэрдьигэстээх мындыр маастара бастаан кыаҕар соччо эрэммэтэҕэ, онтон боруобалаан көрөргө санаммыта. Онон сааскыттан ыла дьон кэпсээнигэр киирбит тааҥка сэлиэнньэ дьаһалтатын көмөтүнэн тиллэн барбыта. Дьаһалта хаарбах тимиринэн хааччыйар, оттон Захар Егорович айар.
“Бастаан бу идея олоххо киирэригэр саарбахтаабытым. Хантан эмэ дьиҥнээх тааҥканы булуохтара дии санаабытым. Сэлиэнньэҕэ саҥа болуоссаты туттахтарына, биһиги тааҥкабыт онно туруохтаах. Улуу Кыайыы 75 сылыгар сир-дойду аайы бэлэмнэнии барарынан, оттон мин сэрии содулун бары ыардарын ааспыт оҕо буоларбынан, туора туран хаалбакка, бэйэм кылааппын киллэрэргэ сананным”, — диир Захар Павлов.
Захар Егорович тааҥкатын быйыл бүтэрэр соруктаах. Аны саамай ыарахана – люгун оҥоруу күүтэр. Куорпуһа, гусеничнай лиэнтэлэрин киллэрэн туран, хомулунна диэххэ сөп. “Сааһыран истэҕим аайы арыый бытаарбыт курдукпун, хата, уолбар махтанабын, барытын сатыыр, аныгылыы толкуйдаах, онон түргэнник үлэлииргэ көҕүлүүр”, — диир маастар.
СИА.