Горнай улууһун Семен Данилов аатынан Бэрдьигэстээх орто оскуолатыгар медико-биологическай кылаас арылынна. Бу кэрэ-бэлиэ күҥҥэ Максим Кирович Аммосов аатынан Хотугулуу-Илиҥҥи федеральнай университет мэдиссиинискэй институтун, Дьокуускайдааҕы мэдиссиинискэй кэллиэс преподаватэллэрэ, Горнай улууһун салалтата ыалдьыттаатылар.
Бэрдьигэстээх нэһилиэгин баһылыга Алексей Аргунов, Горнай улууһун үөрэх управлениетын начальнига Варвара Сметанина, Горнай улууһун киин балыыһатын кылаабынай бырааһа Леонид Апросимов, Максим Кирович Аммосов аатынан Хотугулуу-Илиҥҥи федеральнай университет мэдиссиинискэй институтун анатомияҕа хаапыдыратын дассыана, мэдиссиинискэй наука хандьыдаата Екатерина Сергина, Дьокуускайдааҕы мэдиссиинискэй кэллиэс преподавателэ, приемнай хамыыһыйа сэкирэтээрэ Александра Шарапова саҥа арыллыбыт медико-биологическай кылаас оҕолоругар, учууталларыгар, төрөппүттэригэр бэйэлирин эҕэрдэ тылларын, баҕа санааларын эттилэр.
Үөрүүлээх тэрээһиҥҥэ оҕолор үрүҥ халаат кэппиттэрэ, бэйэлэрин мэктиэ тылларын эппиттэрэ олус долгутуулаах буолла. Кэлбит ыалдьыттар интэриэһинэй маастар-кылаастары, лиэксийэлэри ыыттылар. Кэллиэс преподавателлэрэ уонна устудьуоннара сирэйи, тыҥыраҕы хайдах көрүнэргэ, ыарыһаҕы хайдах эмтииргэ, кыһыл оҕону хайдах көрөргө-истэргэ, анаалыстары хайдах оҥорорго маастар-кылаастары көрдөрдүлэр.
Оттон Хотугулуу-Илиҥҥи федеральнай университет преподавателлэрэ «Доруобуйаҥ бэйэҥ илиигэр», «Инники үөрэххин билиҥҥэттэн тал» диэн олус интэриэһинэй кэпсэтиилэри онордулар.
Бу күн оскуола, мэдиссиинискэй институт, кэллиэс уонна улуустааҕы балыыһа бырайыак олоххо киирэригэр бииргэ үлэлэһэр сүбэлэҥи түһэристилэр.
Ольга Алексеевна Пахомова,
дириэктэри иитэр үлэҕэ солбуйааччы.
Хаартыскалар: Горнай киин балыыһатын «Телеграм» ханаалыттан.