Быйыл өрөспүүбүлүкэҕэ Нэһилиэнньэ дьарыктаах буолуутун көҕүлээһин уонна Горнай улууһугар Үлэ сылларынан сибээстээн, бу күннэргэ урбаанньыттар «Үлэ — ситиһии олуга» диэн зонатааҕы форумнара буолан ааста.
edersaas.ru
Тэрээһиҥҥэ Дьокуускайтан, Мэҥэ Хаҥаластан, Хаҥаластан, Намтан, Кэбээйиттэн, ыраах Дьааҥыттан тиийэ кэлэн кыттыыны ыллылар. Дьон болҕомтотун Горнай улууһун сатабыллаах дьонун, тарбахтарыгар талааннаах уустарын уонна иистэнньэҥнэрин, булугас толкуйдаах ыччаттарын сонун бырайыактарын быыстапката тарта.
Аэлита Ефремова улуустааҕы гимназия 10-с кылааһын быйыл бүтэрбит. Дьоҕурдаах үөрэнээччи уһуйааччыта Афанасий Ефремовы кытта толкуйдаабыт сонун тэрилэ үгүс киһини соһутта. Ол да иһин буолуо, кини аттыттан быыстапка кэмигэр үгүс киһи арахсыбата.
Кыысчаан эбии үөрэхтээһин киинигэр эдэр тиэхиньиктэр куруһуоктарыгар дьарыктанар эбит.
Кини толкуйдаабыт тэрилэ чааһынай дьиэлээх, даачалаах дьон тутталларыгар туһаайыллыбыт. Бу тэрилин Аэлита бэйэтэ иккис сылын туттар буолан, интэриэһиргээбит дьоҥҥо холкутук быһаарар. Кыыс уустугурда барбакка, оҕо-оҕо курдук, киһи күннэтэ туттар тэриллэрин: кунуопкалаах төлөпүөнү, уруучуканы уонна көмпүүтэр «мышкатын» туһанан, аныгы үйэ «өйдөөх» тээбиринин айбыт.
Аэлита сонун бырайыагын ис хоһоонун маннык быһаарар:
— Уу бааҕар анал поплавок ууга дагдайа сылдьар. Уу бүттэҕинэ, хаһаайыныгар уонна уу кутар тэрилтэҕэ: «Уум бүттэ», — диэн «смс иһитиннэрии» ыытар.
Ууну хачайдыыр носуос улахан баҕайытык тыаһыыр дии. Аны уу бааҕа саалаттан эбэтэр утуйар хостон олох ыраах турар буолар. Сорохтор ууларын бааҕын таһырдьа туталлар. Онон бу тэрил дьоҥҥо олус наадалаах дии саныыбын.
Аэлита Ефремова бу үлэтинэн Арассыыйатааҕы Научнай тэхэньиичэскэй куонкуруска кыттан, лауреат буолбут. Эдэр рационализатор кэскиллээх дьыалатын сотору кэминэн олоххо киллэриэ диэн эрэнэбит.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.