“Бензин сыаната бырабыыталыстыба нолуокка “маневр” оҥорбутун түмүгэр улаатта”, — диэн иһитиннэрэр РФ бэрэсидьиэнэ Владимир Путин быһа эфирын кэмигэр.
edersaas.ru
Ыам ыйыгар бензин сыаната үрдээбитэ Россия олохтоохторун барыбытын долгутта. Бу туһунан ыйытыыга Владимир Владимирович: “Бензин сыаната энергетика эйгэтигэр энергетическэй ресурсалары, сымнатан эттэхпинэ, сыыһа хонтуруоллааһынтан таҕыста. Бырабыыталыстыба ньиэби экспорка таһаарыыга нолуокка миэрэлэри ылынан, “маневр” оҥорбутун түмүгэр итинник балаһыанньа үөскээтэ. Кырдьык, ити “маневр” туһалаан, ньиэби бэйэтинэн тас дойдуга таһаарыы элбээтэ, ону сэргэ. ньиэп сыаната үрдээтэ. Оттон ис ырыынакка сыана үрдээһинэ хампаанньалар сыананы тас уонна ис ырыынакка тэҥнии сатыылларыттан тахсар. Билигин от ыйыттан сыана үрдүө суоҕа, бу маны бырабыыталыстыба, Монополияны утары сулууспа кыраҕытык кэтиэҕэ”, — диэн бэлиэтиир кини.
Быйылгы быһа эфир кэмигэр РФ бырабыыталыстыбатын чилиэннэрэ, эрэгийиэннэр лидердэрэ, улахан хампаанньалар салайааччылара видеосибээс нөҥүө нэһилиэнньэ ыйытыытыгар бэрэсидьиэни кытары тэҥҥэ хоруйдаһар усулуобуйалара тэриллибитэ. Онон бу боппуруоска Энергетика миниистирэ Александр Новак эмиэ хоруйдаата. Кини бэлиэтииринэн, бырабыыталыстыба манна суһал миэрэлэри ылынан, билигин ис ырыынакка сыана хонтуруолламмыт. “Билигин сыана үрдээбэккэ, тохтоон турар. Бэс ыйыттан акциз кыччыаҕа. Онон от ыйыгар сыана үрдүө суоҕа”, — диэн иһитиннэрэр кини.
Ону сэргэ, энергетика боппуруостарыгар эппиэттиир вице-премьер Дмитрий Козак бензин, сэлээркэ сыанатын хонтуруоллааһыҥҥа Судаарыстыбаннай Дуумаҕа сокуон барыла оҥоһулла сылдьарын бэлиэтээн эттэ. Владимир Владимирович бу сокуон барылын өйүөх буолла.
Аграфена КУЗЬМИНА, “Саха сирэ” хаһыат, edersaas.ru.