Массыына хаһаайыттарыгар бэнсиинтэн гааска көһүү ороскуотун 90% толуйуохтара. Бу сыалга бүддьүөттэн 24 мөлүйүөн солкуобай суумалаах субсидия көрүлүннэ. Ону тэҥэ, гааһынан барар массыыналаах дьоҥҥо тырааныспар нолуога 50% чэпчиэҕэ.
Билигин Арассыыйа эрэгийиэннэригэр бэнсиин лиитирэтин сыаната ортотунан 50 солкуобайдаах, оттон саппараапкаларга айылҕа гааһын сыаната – 20 солкуобай кэриҥэ. Массыына үксэ гааска көһөрө экология да, экэниэмикэ да өттүнэн табыгастаах. Ол эрээри, гаас саппараапкалара аҕыйахтара мэһэйи үөскэтэр буолуохтаах. Бырабыыталыстыба бу боппуруоһу муоһалыы тутта.
—Саха сиригэр 2030 сылга диэри 40-ча гаас саппараапкаларын тутар былааннаахпыт. Ону тэҥэ, тырааныспар нолуогар чэпчэтии көрүлүннэ. Гааһынан барар массыына уонна гаас саппараапкалара элбииллэрэ экэниэмикэ да, экология да өттүнэн көдьүүстээх буолар, — диэн Ил Дархан Айсен Николаев этэр.
Оттон бырамыысыланнас, геология миниистирэ Максим Терещенко маннык этэр:
— Бэнсиин сыаната үрдээн, уматык сыаната бүддьүөт бары хайысхаларыгар күүскэ дьайар. Судаарыстыба өйөбүлүнэн, гааска көһүү 2-3 төгүл чэпчиэҕэ. Ил Дархан экология, экэниэмикэ өттүнэн барыстаах уматыкка көһүүнү өйөөн, гааһынан барар массыыналары элбэтэр туһунан этэрэ сөптөөх. Мантан дьон ороскуота эмиэ аҕыйыыр, дьиэ кэргэн бүддьүөтэ барыһырар.
Мантан ыла гаас саппараапкаларын ситимин кэҥэтэр сорук турар. Үлэ саҕаланна. Оттон массыыналаах дьон толкуйданыҥ, төһө барыһыраргытын ааҕыҥ-суоттааҥ.
Ангелина Васильева, “Саха сирэ” хаһыат, edersaas.ru