Өрөспүүбүлүкэҕэ мөлүйүөнүнэн туонна бэнсиини тастан тиэйэн аҕалаллар, ол иһин биһиэхэ уматык бүтүн Арассыыйа үрдүнэн ыарахан сыаналааҕынан биллэр. Ити ас-таҥас, табаар, айан сыанатыгар улаханнык охсор. Сахабыт сирин АЗС-тарыгар сыана сылга хаста да үрдүүрүн ааһан, уматык хаачыстыбата быстар мөлтөх, онтон сылтаан тимир көлө түргэнник элэйэр, алдьанар. Маннык балаһыанньаны көннөрөөрү, аны 3-4 сылынан нэһилиэнньэҕэ удамыр сыаналаах бэнсиини өрөспүүбүлүкэ иһигэр оҥорор буолуохтара.
edersaas.ru
Аан дойду ырыынагар ньиэп сыаната, бэнсиин акциһа үрдээтэҕин аайы, уматык эмиэ тэҥҥэ ыараан иһэр. «Роснефть», «Лукойл», «Газпромнефть» курдук бөдөҥ ньиэп хампаанньаларын заправкалара Саха сиригэр ханна да суох. Күн бүгүн өрөспүүбүлүкэни «Саханефтегазсбыт», «Туймаада нефть», «Сибойл» хааччыйан олороллор.
«Кинилэр үлэлэригэр кэккэ ыарахаттары көрсөллөр, сыл аҥаарын иһигэр бэнсиини кууһунан атыылаһан ыларга сыана 10 солк. ыараабыта даҕаны, заправкаларга 5 эрэ солк. үрдэтиллибитэ. «Саханефтегазсбыт» бэс ыйыттан сыана үрдүүрүн тохтото сатаан, бэйэтигэр ночооттоохтук үлэлээтэ, хампаанньа салгыы сыананы тутар кыаҕа суох, оттон судаарыстыбаҕа уматык сыанатын субсидиялыыр быраап бэриллибэт. Ол иһин өрөспүүбүлүкэ иһигэр ГСМ оҥоруутун саҕалыахпытын наада», — диэн Ил Дархан Айсен Николаев этэр.
20-30 тыһ. туонна бэнсиини оҥорор собуот тутуутун ороскуота 45-50 мөл. дуоллар. Үбүлээһини инвестор оҥоруохтаах. Оттон гаас турбата өрөспүүбүлүкэ бас билиитигэр — «Саханефтегазсбыкка» баар.
«Инвестор үлэтин саҕалаатаҕына ньиэби, эбэтэр гааһы переработкалыыр собуот тутуллан, 3-4 сылынан үлэлиир кыахтаах. 2022 сылга уматыгы манна оҥорон таһаарыахпыт диэн эрэнэбит, оччотугар бэнсиин сыанатын бэйэбит быһар буолуохпут», — диэн бэлиэтээтэ Айсен Николаев.
Марианна Тыртыкова, «Саха сирэ», edersaas.ru