«Сахамедиа» холдинг тэрийэр «Саха сирин киэн туттуута – 2019» норуот бириэмийэтигэр «Урбаанньыт» түһүмэххэ интэриниэт куоластааһын нөҥүө Руслан Шипков 2050 куолаһы ылан, бочуоттаах иккис миэстэҕэ тахсыбыта.
edersaas.ru
Руслан Шипков «Сахаметан» хааччахтаммыт эппиэтинэстээх тэрилтэ толорооччу дириэктэрин аатын үгүс киһи истэн билэрэ буолуо. Кини күөгэйэр күннэригэр «Якутгазпром», «Саханефтегаз» хампаанньаҕа уонна СӨ бырабыыталыстыбатыгар, Ил Түмэҥҥэ салайар үлэҕэ сылдьыбыта. Ол эрэн, былаас уларыйан 50-нун саҥа ааспыт бэрт тэтиэнэх киһи биэнсийэҕэ тахсыан иннинэ биир күн үлэтэ суох хаалбыта.
Халлааҥҥа харбыаласпыт Урал хайаларын быыһыгар улааппыт киһи олоххо тардыһыыта онтон кэбирээбэтэҕэ, хата ыстаал курдук ууга-уокка хатарыллан, өссө күүһүрэн, кыаҕыран, кытаатан биэрбитэ. Массыынаны чэпчэки сыаналаах гаас уматыкка көһөрөр санаа киирбитэ. Ол курдук, баантан кирэдьиит ылан, «Сахаметан» тэрилтэни тэрийэн, массыыналары, оптуобустары метан уматыкка көһөрөн барбыттара. Холобур, бэнсиин 56 солкуобай, оттон гаас 21 солкуобай. Өскөтүн чааһынай дьиэ гарааһыгар компрессор туруордахха, букатын да 6 солкуобайга сапыраапкаланыахха сөп. Суотабай төлөпүөнү ииттэрэр курдук, массыынаҕын түүн компрессорга холбоон кэбиһэҕин, туолла да бэйэтэ тута арахсар.
Күн бүгүн өрөспүүбүлүкэҕэ ыгыллыбыт гаас 6 ыстаансыйата уонна Аллараа Бэстээххэ убатыллыбыт гаас 1 ыстаансыйата баар. гааһы -160С0 диэри тоҥмот гына убаталлар. Бу гаас салгынтан чэпчэки, итиэннэ итии уонна тымныы салгын охсуһуутун тулуйумтуо.
Холобур, «ЯПАК» тэрилтэ оптуобустары гааска көһөрөн, 2019 сыл ыам ыйынааҕы туругунан, уонча сыл иһигэр 354 мөлүйүөн солкуобайынан барыһырбыт. Аҥаардас бэнсиин уонна гаас уматык сыанатын араастаһыытыгар.
“Жилкомсервис” түөрт сыл иһигэр 19 «КамАЗ» массыынаны атыылаһан баран, гааска көһөрөн, 78 мөлүйүөн солкуобайынан барыһырбыт. Уматыкка ороскуоттарын кыччатан.
Тэрилтэлэр уонна үгүс дьон гааска көһүөхтэрин, анал тэрил сыаната үрдүгэ тохтотор эбит. Оттон Татарстан уонна Сахалин гаас уматыкка көһүү ороскуотун 90% олохтоох бүддьүөттэн үбүлүүр буолан, ол диэки бэнсиин сыаната ыарыырыгар наадыйбаттар. Үгүс киһи гаас тоҕо барыа диэн куттанар эрээри, ыксаллаах быһыы-майгы министиэристибэтэ убатыллыбыт метаны куттала суох уматык ахсааныгар киллэрэр, оттон бэнсиин быдан кутталлаах. Анал тэрил туруоралларыгар убатыллыбыт гаас массыына иһигэр киирбэтин курдук оҥороллор, суоппардар ыйыллыбыт кэмҥэ анал бэрэбиэркэни ааһаллар.
Руслан Шипков, биһиги өрөспүүбүлүкэбитигэр тиэхиньикэни гаас уматыкка көһөрүүнү олохтоох бүддьүөттэн субсидиялыыллара буоллар, тыа хаһаайыстыбатын, онтон да атын салаа тэрилтэлэрэ ороскуоттарын икки төгүл кыччатан, барыска түргэнник тахсыа этилэр диэн этэр.
Марианна Тыртыкова, «Саха сирэ», edersaas.ru