Тустууну сэҥээрээччилэр болҕомтолоро бу күннэргэ Белоруссия чөмпүйэнээтигэр туһаайыллар. Сүрүннээн бу түһүлгэ түмүгүнэн аан дойду, Европа итиэннэ аны сайын, бэс ыйын 20-30 күннэригэр, Минскэйгэ ыытыллыахтаах II Европа оонньууларыгар кыттар хамаанда састааба сүүмэрдэниэҕэ.
Тохсунньу 11-тэн 15-гэр диэри Лида куоракка буолар күрэхтэһиигэ саха тустууга оскуолатын үс иитиллээччитэ – Европа үс төгүллээх призера Владислав Андреев, Иван Ярыгин Гран-при турнирын чөмпүйүөнэ Ньургун Скрябин, Александр Медведь бирииһигэр норуоттар икки ардыларынааҕы турнир кыайыылааҕа Андрей Бекренев — кыттар.
Быйылгы чөмпүйэнээккэ Владислав Андреев 57 киилэҕэ диэри ыйааһыҥҥа тустуоҕа, оттон Андрей Бекренев бэйэтин күүһүн 61 киилэлээхтэргэ холонуо диэн буолар. Ньургун Скрябин 65 киилэҕэ диэри ыйааһыҥҥа лидер буоларын бигэргэтиэн наада. Манна киниэхэ сүрүн утарылаһааччыларынан уопуттаах бөҕөстөрү — Европа 2016 сыллааҕы үрүҥ көмүс призера Георгий Колиевы, дойду икки төгүллээх чөмпүйүөнэ Виктор Середаны сэргэ эдэр тустууктар – Европаҕа бастыыр иһин күрэхтэһии призера Денис Максимов, аан дойдуга, Европаҕа бастыыр иһин турнирдар призердара Гусейн Шахбанов буолуохтара.
Күрэхтэһии кэнниттэн тута “Стайки” спорт киинигэр сүүмэрдэммит хамаанда эрчиллэр-бэлэмнэнэр сбора саҕаланыаҕа.
Роман Попов, «Саха сирэ» хаһыат, edersaas.ru
Хаартыска Интэриниэттэн ылылынна.