Кытай туриһа Ча Эрдан бу күннэргэ атаһыгар Александр Архиповка Сунтаар Хаданыгар ыалдьыттаан баран, сарсын иккиэн Кытайга көтөллөр.
— Кытай туриһа Хадаҥҥа кэлэн, олохтоох ыччаты кытта куйуурдаата. Онон Саха сирин соҕуруу нэһилиэгэр сылдьан, балыктаан, элбэх саҥа доҕордонон баран эрэр, — диэн кэпсиир Александр Архипов.
— “Сахамедиа” пресс-киинигэр кэпсэтиэх буолбуппут, хааллаҕа дии…
— Ча Эрдааҥҥа эһиги көрдөһүүгүтүн тиэрпиппэр: “Өймөкөөҥҥө баран кэлбитим буоллар, бэйэм да көрдөһөн пресс-кэмпириэнсийэ оҥоруом этэ. Санаам туолбатах эрээри, тугу кэпсиэмий? Үчүгэйдик бэлэмнэнэн баран, эһиил Өймөкөөҥҥө хайаан да кэлиэм! Мин тохсунньу тымныытыгар массыынаҕа олорон буолбакка, бэлисипиэтинэн тиийиэхпин баҕарабын”, — диир. Түгэнинэн туһанан, Мэҥэ Хаҥалас Нуораҕанатыгар, Таатта Дьохсоҕонугар, Томпо Мэҥэ Алданыгар уонна Томпо Хаандыгатыгар көмөлөспүт саха дьонугар уонна Сунтаар Хаданыгар билсибит саҥа доҕотторугар Саха сирин туһунан наһаа истиҥ өйдөбүлү хаалларбыттарыгар барҕа махталын тиэрдэр.
… Оттон биһиги Ча Эрдаҥҥа бэлисипиэттээх айанынан интэриэһи тардан, умнуллубат тохсунньуну бэлэхтээбитигэр истиҥ махталбытын тиэрдэбит . Тымныы Полюһугар Өймөкөөҥҥө тиийэр баҕата уостубатын, дойдутугар этэҥҥэ тиийэригэр баҕарыаҕыҥ.
Елена ПОТОЦКАЯ,»Саха сирэ» хаһыат, edersaas.ru