Француз экстремал-туриһа, блогер Ив Чалоин Тымныы поюһугар Өймөкөөҥҥө айаннаан иһэн, бэлисипиэтэ алдьанан, Таатта улууһун Чөркөөҕөр «Алгыс» кафеҕа тохтоото.
edersaas.ru
Кини манна олохтоохтук оҥостон, өрөмүөннэнэн, итии киллэринэн баран, салгыы Томпоҕо айанныыр былааннаах.
Мин Ив Чалоины киэҥ нэлэмэн Тааттаттан булаары син өр үлэлэстим. Билэрдии, Таатта улууһун дьахталларын сэбиэтин актыбыыһа Марфа Аммосоваҕа эрийдим. Сыыспатахпын. Өрөспүүбүлүкэҕэ киэҥник биллэр уопсастыбанньык сотору кэминэн француз экстремала ханна тохтообутун булан ылла.
Ол туоһута — миэхэ Чөркөөхтөн «Алгыс» кафеттан ааппын ааттаан туран, бу тэрилтэ үлэһитэ Ньургуйаана Толстякова эрийдэ. Кини Ив Чалоин кафеҕа күнүс икки чаас саҕана кэлбитин кэпсээтэ:
— Дэлби тоҥон киирбит киһини чэйдэппиппит. Экстремал айанньыт иһэрин туһунан билэр суоппардарбыт сэрэппиттэрэ. Кинилэр «КамАЗ» массыыналарынан ситэн ааспыттар этэ. Икки чааһынан хантан эрэ француз кэргэнин кытта табаарыстара кэлбиттэрэ.
Мин Ньургуйаана төлөпүөнүнэн Ив Чалоины кытта салгыы кэпсэттим да, киһим нууччалыы соччо өйдөөбөт эбит. Онон төлөпүөнү кинини арыаллыы сылдьар эдэр киһиэхэ биэрдэ. Роман этэринэн, кини Ив Чалоин кэргэнин уонна оператор уолу илдьэ иһэр эбит. Бу биригээдэ Өймөкөөҥҥө диэри экстремал туриһы арыаллаан иһэллэр.
Сибээстээх сиргэ тиийэн хоноллор, ханна тиийбитин билсэллэр. Ыксаллаах түгэҥҥэ, сибээс суох сиригэр Ив Чалоин рациянан биллэриэхтээх эбит. Бакаа итинник түгэн көстө илик буолан, рация туһанылла илик үһү.
Салгыы француһу кытта Ньургуйаана Толстякова нөҥүө кэпсэттим. Ол эбэтэр мин батсаабынан ыйытыыларбын суруйабын, сотору буолан баран, кыыспыттан хардатын тутабын. Ив Чалоин кэргэнэ кинигэ суруйа сылдьар эбит. Чалоиннар икки оҕолоохтор: уоллара — инженер, кыыстара — менеджер. Икки сиэннээхтэр. Француз экстремала кытай туриһа былырыын Өймөкөөҥҥө бара сатаан баран, бэлисипиэтэ алдьанан төннүбүтүн Дьокуускайга кэлэн баран истибит. Ол эрээри кинини табаарыстара арыаллыы сылдьар буолан, туохтан да куттаммат эбит. Экстремал-спортсмен анаан бэйэтин бэрэбиэркэлэнээри, Өймөкөөҥҥө саамай тымныы кэмҥэ кэлбит.
— Мин соһуйа көрбүтүм диэн, француз наһаа улахан түү үтүлүктээх. Дойдутугар француз иистэнньэҥэр анаан тиктэрбит.
Бу үтүлүгэ абыраабыт аҕай үһү. Түүн суолга түбэстэҕинэ балааккатыгар утуйар, тоҥмот эбит. Сарсыарда турарыгар тымныы үһү. Биһигиттэн: «Биир күн хонуохпун сөп дуо?» — диэн ыйытар.
Хата киниттэн бэйэбит соһуйдубут — хайдах ыраахтан кэлбит ыалдьыты таһырдьа хонноруохпутуй, итии дьиэҕэ харабыл хоһугар сынньатыахпыт, — диэн кэпсиир Ньургуйаана Толстякова. Француһу кытта ситимнээччим салгыы маннык бэлиэтиир:
— Француз эн: «Аара ордук тугу сөбүлүү көрдө?» — диэн ыйытыыгар: «Дьон үтүө санаалааҕыттан соһуйдум уонна үөрдүм.
Киһи барыта тохтоон: «Көмө наада дуо? Түһэрэн биэрэбит дуо?» — диэн ыйытар.
Мин соругум — бэйэм кыахпынан Өймөкөөҥҥө тиийии. Аара арыаллыыр дьонум миигиттэн олох ыраах сылдьаллар», —— диир. Ыксаллаах түгэҥҥэ эрэ билсэллэр эбит.
Дьэ, онон француз экстремал-туриһа, кытай айанньытыгар холоотоххо, ох курдук оҥостон кэлбит. Онон Өймөкөөҥҥө холкутук тиийииһи.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Ньургуйаана Толстякова түһэриитэ.