Бүгүн Национальнай бибилэтиэкэ историческай саалатыгар «Вера Егорова-Чарду – Герой ийэ, селькор” кинигэ сүрэхтэннэ.
Сунтаар улууһун Кутана с. олохтооҕо, 11 оҕо ийэтэ, 50-чэ сиэн эбээтэ Вера Егорова интэриэһинэй, баай ис хоһоонноох олоҕу олорон, бэлиэ суолу хаалларбыт дьоллоох. Кини үйэ аҥаарын устата Сунтаар улууһун хаһыатын актыыбынай селькора, уопсастыбынньыга этэ. Кини улуус уонна өрөспүүбүлүкэ хаһыаттарыгар суруйбут ыстатыйалара, олоҕу анаарыылара, бэчээккэ тахсыбакка хаалбыт бэлиэтээһиннэрэ бэрт табыгастаахтык таҥыллан киирбиттэр. Чугас дьонун, оҕолорун ахтыыларын кинигэ араас түһүмэхтэригэр ааҕаҕын.
“… Былыргы дьыллар мындааларыттан саха омук киэҥ сиринэн-уотунан тайаан олорбут-үөскээбит эбит. Саха киһитэ ханна-ханна тиийбэтэҕэ-түгэммэтэҕэ баарай? Ол курдук, ийэм ийэтин төрүттэрэ ыраахтан кэлбит дьон эбиттэр. Красноярскай кыраай сүүнэ улахан Дьэһиэй (Ессей) эбэтигэр түөлбэлэнэн олорбут сахалартан кэлбиттэр. Онно билиҥҥэ диэри ийэбит төрүттэрэ түһүүлэнэнэн олороллор…”, – диэн Вера Егорова-Чарду төрүттэрин туһунан “Кыым” хаһыакка суруйбут.
Кинигэни Вера Петровна уонна Андрей Кириллович Акимовтар кыыстара Анна Акимова хомуйан таһаартарда, кинигэ эрэдээктэринэн Акимовтар биир дойдулаахтара, биллэр суруналыыс Милан Афанасьев уонна Петр Попов үлэлээбиттэр.
Кинигэ “Дани”Алмас” ХЭУо-ҕа бэчээттэнэн таҕыста. Сүрэхтэниигэ кэлбит эрэдээктэр Петр Попов Вера Петровна хаһыаттарга дойдутун элбэх дьонун сырдаппытын, дьоҥҥо-сэргэҕэ биллэрбитин сөхпүтүн эттэ. “Эһиги кинигэҕититтэн бу түөлбэ олоҕун биллим, билиим-көрүүм өссө кэҥээтэ”, – диэн үөрэн туран бэлиэтээтэ. Күүкэй нэһилиэгиттэн төрүттээх, филологическай наука доктора Василий Илларионов, Кутана оскуолатыгар өр сылларга дириэктэрдээбит, Аҕа дойду Улуу сэриитэн бэтэрээнэ Василий Александров, ыаллара Мария уонна Валерий Васильевтар уо.д.а. кинигэ дьоруойун истиҥник-иһирэхтик ахтан-санаан аастылар.
Биир дойдулаахтара, куоракка олохсуйбут Антонина Григорьева Акимовтар аҕа баһылыктара, үлэһит үтүөтэ Андрей Кириллович уолаттары пиэримэҕэ ыанньыксыттыы тахсары бастакынан көҕүлээн, улахан “революцияны” оҥорбуттарын кэпсээтэ. Антонина Елисеевна ону сэргэ, Күндэ туһунан урут ханна да бэчээккэ тахсыбатах чахчылары арыйан, бүгүҥҥү көрсүһүү ис хоһоонун өссө дириҥэттэ.
Саҥа таһаарыы сүрэхтэниитин ийэтин суоллаан, суруксут, суруналыыс идэтин ылбыт, билигин “Саха сирэ” хаһыат эрэдээктэрин солбуйааччы Анивера Акимова иилээн-саҕалаан ыытта.
Надежда ЕГОРОВА, “Саха сирэ” хаһыат, edersaas.ru