Бэлисипиэттэри уордулар

Ааптар: 
Бөлөххө киир:

Буруйу оҥоруу көрүҥнэринэн «бэргиир» кэмнэрдээх. Ол дьыл кэмиттэн тутулуктаах. Холобура, сааскы-сайыҥҥы ыйдарга уоруу, ол иһигэр, чуолаан бэлисипиэттэри уоруу, элбиир. Онно ханнык да тимир торуос да көмөлөспөт.

edersaas.ru

СӨ ИДьМ-тын пресс-сулууспата иһитиннэрбитинэн, полицияҕа бэлисипиэттэри уоруу туһунан иһитиннэриилэр, сайабылыанньалар киирэ тураллар.

Ол курдук, Дьокуускай куорат полициятын 3 №-дээх отделын дьуһуурунай чааһыгар биир дьахтар  40 тыһ. солк. сыаналаах «Stern» бэлэсипиэтин уордарбытын туһунан сайабылыанньа киллэрбит.

Кини полицейскайдарга быһаарбытынан, бэлисипиэтин түүн подъезка хаалларбытын, торуоһун алдьатан, ылан барбыттар.

Ити күн аны Нам улууһугар 41 саастаах дьахтар дьиэтин тэлгэһэтиттэн таах турар, 12 тыһ. солк. сыаналаах бэлисипиэтин уоран барбыттар.

Бу чахчыларынан бэрэбиэркэлэр бара тураллар диэн пресс-сулууспа иһитиннэрдэ.

Итинэн сибээстээн, полиция маннык сүбэлэри биэрэр:

1). Бэлисипиэккин көрүүтэ суох хаалларыма. Сүрэҕэлдьээбэккэ-хайаабакка, хаһыс да этээс буоллун, подъезка буолбакка, кыбартыыраҕар киллэрэн туруор.

2). Оттон кылгас да кэмҥэ подъезка туруорарга күһэллэр буоллахха, эрэллээх,  анал күлүүстээх торуоһунан туттар.

3). Маныаха бэлисипиэккин, туттарар сиргин төһө бөҕөтүн бэрэбиэркэлээн эрэ баран, хааллар.

4). Видеокамера баар сиригэр туруорарыҥ өссө эрэбил буолуо этэ.

5). Бэлисипиэккин билбэт киһигэр быстах да бириэмэҕэ туттарыма.

6). «Тимир атыҥ» туох уратылааҕын өйдүү сырыт (өҥө-дьүһүнэ, туох эмит суруга-ойуута, киэргэтиитэ). Оннук ураты бэлиэлэрэ суох буоллаҕына, бэйэҥ тугунан эмит, холобура, сотуллубат кыраасканан бэлиэтээ.

7). Маны таһынан, хас биирдии бэлисипиэт бэйэтэ нүөмэрдээх (арааматыгар). Ону бэлисипиэтиҥ пааспарыгар суруйан биэр.

Биһиги корр., «Саха сирэ» хаһыат, edersaas.ru

Хаартыска: интэриниэттэн.

+1
0
+1
0
+1
0
+1
0
+1
0
+1
0
+1
0