Маны аах Уопсастыба

Бэлэсипиэтинэн айанныы сылдьар Испания спортсмена үлүйэн балыыһаланна

Испанияттан сылдьар экстремал-спортсмен Хуан Менендес Гранадос  Черскэй — Дьокуускай туһаайыынан бэлэсипиэтинэн айаннаан иһэн, Аллараа Халыма Колымскай нэһилиэгин амбулаториятыгар эмтэнэ киирдэ.

Олохтоох эмчиттэр кини үлүйэн эрэрин бэлиэтээн, суһал көмөнү оҥороот, улуустааҕы балыыһаҕа тиэрдибиттэр. Бу туһунан Доруобуйа харыстабылын пресс-сулууспата иһитиннэриитин сонуннары киэҥник тарҕатар өрөспүүбүлүкэтээҕи уонна федеральнай ааҕыныстыбалар суруйдулар.

Улуус киинин балыыһатыттан эмсэҕэлээччигэ суһал мэдиссиинэ көмөтүн оҥорор киин исписэлиистэрэ телемэдиссиинэ консультациятын ыыттылар. Хуан Менендес Гранадос билигин өрөспүүбүлүкэтээҕи 2 №-дээх балыыһа хирурдарын сүбэлэринэн Аллараа Халыма улууһун киин балыыһатыгар эмтэнэ сытар.

Халыма-Индигиир улуустарыгар бу күннэргэ эмиэ улаханнык тымныйда. Онон бэлэсипиэттээх киһитээҕэр, массыынанан да айаннааччылар сэрэхэдийэр кэмнэрэ.

 

Елена ПОТОЦКАЯ, “Саха сирэ” хаһыат, edersaas.ru

Хаартьыска — Алексей Курило.

1
0
Telegram @edersaas20