Маайа уонна Даайа ыкса ыаллыылар. Олус дьүөгэлэспэтэллэр да, син ылсан-бэрсэн эйэ дэмнээхтик олороллор. Саастарынан араа-бараа дьахталлар. Оҕолоро улаатан үөрэҕи-үлэни батыһан хайыы-үйэ тэлгэһэттэн тэлэһийбиттэрэ.
Маайа уонна Даайа бу кыһыҥҥы хараҥаҕа түөлбэ мунньаҕыттан харбыалаһан иһэллэр. Олунньу саҥата. Кыһын обургу билигин да сокуоннай быраабын ыһыктыа ыраах. Ол эрээри түөлбэлэрин салалтата сааскы бырааһынньыктар чугаһаабыттарын санатта. Олохтоох эр дьону испииһэктээн, дьахталлар сэрэбиэй тартылар. Сэбиэскэй Аармыйа күнүгэр бэлэх оҥороллоро ирдэнэр, оччоҕо ол киһи кулун тутар аҕыһыгар дьахтарга утары бэлэх уунуохтаах. Маайалаах Даайа кэпсэтиилэрэ ол тула буолла.
— Эйиэхэ ким түбэстэ? – Маайа ыйытар. – Мин олох санааргыы ахан иһэбин.
— Тыый! Ол туохтан? – Даайа соһуйда.
— Ээ! Булан-булан дьэ Сүөдэримээни тардан ыллым…
Сүөдэримээни билбэт киһи суох. Сотору-сотору “аһаан” баран араллааннаммытын туһунан сурах дэриэбинэни толорооччу. Эдэригэр охсуһууга кыттан “олоро” сылдьыбыта, ол “дойдуттан” майгыта буортуйан, отуора алдьанан кэлбит муҥнаах. Ыал буолбата, түптээх үлэ-хамнас да суох. Кырдьаҕас төрөппүттэрин эрэйдэрин эрэйдээн олорор. Ол эрэн хайдах да быһыылааҕын-майгылааҕын иһин, түөлбэ олохтоохторун испииһэгэр киирдэҕэ. Маайа Сүөдэримээнтэн саллара, бэлэх туттарыан баҕарбата оруннаах курдук. Хата Даайата этии киллэрдэ:
— Атастаһыахха! Мин Сүөдэримээҥҥэ бэлэх оҥоруом. Туох буолуой?! Эрим ырааҕынан аймаҕа дии. Убайыттан син толлор, итирдэҕинэ биллээччитэ суох. Аны дьүөгэм Муоча быраата, кыра эрдэҕиттэн билэр уолум. Миэхэ эн оҕонньоруҥ түбэстэ ээ. Ону сирэ санаатым. Үөрэхтээх мааны киһиэхэ тугу булан биэрээри… Бэйэҥ бэлэх оҥороор.
Итинник гынан биир санааҕа кэллилэр. Маайа дьиэтигэр киирбитэ, оҕонньоро кини кэлэн чэй тардарын күүтэн, хаһыат ааҕа олорор.
— Хайа? Тугу мунньахтаатыгыт? – ыйыталаста.
— Аармыйа күнүгэр эр дьоҥҥо бэлэх оҥороору, испииһэгинэн сэрэбиэй тартыбыт. Онно мин эйигин тардан ыллым, — диэтэ Маайа. Сүөдэримээни сирэн Даайалыын атастаспытын кистээтэ.
— Ээ, тугун эмиэ бэлэҕэй-туһаҕай! Миэхэ тугу да биэримээр. Мин эйиэхэ эмиэ бэлэхтиэм суоҕа, — диэн кэбистэ оҕонньоро. Кытыы нэһилиэк биир ыалыгар бэлэх боппуруоһа итинник судургутук быһаарыллан хаалла.
Хаартыскалар: https://pxhere.com/ru/photo/526423, СИА ылылыннылар