Абый оройуонун Белай Гора бөһүөлэгэр «Якутоптторг» эргиэн-логистика киинин арыйдылар. Манна оҕуруот аһын уонна фруктаны Дьокуускай куоракка курдук уонна чэпчэкитик атыылаһыахха сөп. Бу туһунан Саха сирин премьерэ Андрей Тарасенко иһитиннэрдэ.
“Өскөтүн урут бородуукта сыаната биир киилэтигэр 609 солкуобай буоллаҕына, саҥа тиһигинэн сыана 168 солкуобайга диэри чэпчиир. Бу сүрдээх кэмчилээһин”, — дэһэллэр олохтоохтор. «Якутоптторг» баазатыгар биир киилэ хортуоппуй — 74 солкуобай, луук – 75 солк., арбуз уонна дыня – 140 солкуобай.
Андрей Тарасенко бэлиэтииринэн, 2021 сылга хоту таһаҕаһы тиэйии былаан быһыытынан барар. Арктика оройуоннарыгар навигация кэмигэр торумнаммыт тыа хаһаайыстыбатын бородууксуйатын сүөкээтилэр. Оҕуруот аһын уонна фруктаны “Магдебург” уонна “Мальчиков” теплоходтар аҕаллылар.
Абый оройуонугар күн бүгүн 100 туонна оҕуруот аһа уонна фрукта тиэрдилиннэ.
Эргиэн-логистика киинэ аныгы тэриллэринэн хааччыллыбыт.
Быйыл олохтоохторго бородууктаны дьоҕус авиация көмөтүнэн тиэрдии саҕаланна. Арктика оройуоннарыгар авиа-былаһааккалары чөлүгэр түһэрдилэр. Аллайыаха оройуонугар аһы-үөлү ыраах бөһүөлэктэргэ бөртөлүөтүнэн, онтон парашютунан тиэртилэр.
Ил Түмэҥҥэ Анал этиитигэр СӨ Ил Дархана Айсен Николаев өрөспүүбүлүкэ бырабыыталыстыбатыгар эргиэн-логистика кииннэрин тэрийэргэ сорудахтаабыта Быйыл маннык кииннэр Усуйаана оройуонун Уус Куйгатыгар уонна Аллараа Халыма Черскэйигэр аһыллыахтара.
Саха Өрөспүүбүлүкэтин Ил Дарханын уонна Саха Өрөспүүбүлүкэтин Бырабыыталыстыбатын пресс-сулууспата
Бэлэмнээтэ Женни Стрюкова
Хаартыска: тустаах саайтан