СӨ Бырабыыталыстыбатын Бэрэссэдээтэлин солбуйааччы Ольга Балабкина, олунньу 3 күнүгэр, суһал ыстаап брифинин ыытта.
edersaas.ru
Ааспыт күн туругунан, өрөспүүбүлүкэ үрдүнэн 100 киһи коронавиурстаабыт. Ол иһигэр:
— Дьокуускайга 40 киһи; Мииринэй улууһугар 17 киһи; Алдан улууһугар 8 киһи; Нерюнгрига 6 киһи; Өлүөхүмэ, Томпо улуустарыгар 5-тии киһи; Уус Алдаҥҥа 4 киһи; Үөһээ Дьааҥыга, Ньурбаҕа үстүү киһи; Бүлүү, Нам, Өймөкөөн улуустарыгар иккилии киһи; Кэбээйигэ, Тааттаҕа, Хаҥаласки биирдии киһи.
Ааспыт күҥҥэ Саха сирин үрдүнэн 2024 тест оҥоһуллубут.
Ольга Валерьевна быһыыны туруоруу үлэтэ көхтөөхтүк ыытылла турарын бэлиэтээтэ. Ыарыыттан харыстыыр быһыы бастакы түһүмэҕин өрөспүүбүлүкэ иһигэр 20 485 киһи ааспыт, түмүктүүр иккис быһыыны 1275 киһи ылбыт.
Ольга Балабкина бүгүн Ил Дархан Айсен Николаев саҥа Ыйаахха илии баттаабытын туһунан иһитиннэрдэ. Ыйаахха харантыын эрэсиимин чэпчэтии туһунан суруллубут. Ол курдук, 65 саастарын ааспыт дьон, дьарҕарбыт ыарыылаахтар, дьаҥы утарсар күүстэрэ (иммунитеттара) мөлтөөбүт дьон бэйэни хааччахтаныы эрэсиимиттэн маннык түгэннэргэ тахсыахтарын сөп:
— Коронавирустан бастакы быһыыны ылбыттара 42 хонук кэнниттэн;
— Коронавируһунан ыалдьа сылдьыбыт, ол туһунан федеральнай регистрга суруллубут дьон. Кинилэр ыарыы кэнниттэн 6 ый ааһыыта вакцина ылыахтаахтар, эбэтэр бэйэни хааччахтаныы эрэсиимигэр төннүөхтээхтэр.
Бары санитарнай-эпидемиологическай нуормалары тутуһан туран оҕо оонньуур хосторо, оҕону аралдьытар кииннэр үлэлэрин сөргүтүөхтэрин сөп буолбут. Хаҥкылыыр катоктар, хайыһар куортамныыр тэрилтэлэр, муус пааркалара эмиэ үлэлииллэрэ көҥүллэммит.
«Саха сирэ» хаһыат, edersaas.ru