«Бэйэм бэйэбинэн»

Ааптар: 
Бөлөххө киир:

Биир дойдулаахпыт Валерий Налимов «Бэйэм бэйэбинэн» диэн ааттаах кинигэтин биһирэмэ буолла. 

Валерий Иванович кэнники сылларга суруйбут хоһоонноро бассаап ситиминэн тарҕанан, сорохторугар ырыа айыллан, дьон уоһуттан түспэт. Холобур, Аллыҥа культуратын дьиэтигэр өр сылларга айымньылаахтык үлэлээбит Марта Васильева мелодиятыгар «Мин сүрэҕим» диэн Валерий хоһоонугар ырыа биһиги көлүөнэ дьоно олус сөбүлээн ыллыыллар. Биһиги оһуокайбыт өрөбүллэргэ ыытыллар тэрээһиннэригэр хас да киһи сөбүлээн ыллыыллар. Сааһыран эрэр дьон эдэрдии эрчимнэрин кынаттыыр, дууһа кылын таарыйар ырыа быһыытынан сыаналанар, сүрэхтэн түспэт иэйиилээх, олоххо тардыһыы кыымын курдук ылыналлар. Өссө да элбэҕи айыахтаах доҕорбут Валерий Иванович ааспыт сылга бу олохтон туораабыта. Тыыннааҕар доҕотторо хоһоонноргун хомуйан кинигэтэ таһааттар диэн, мэлдьи баҕа санааларын этэллэр эбит. Ол үтүө санааны толорон, кэргэнэ, кыргыттара кинигэ таһаарбыттарын утары ууннулар. Доҕотторо кэлэн Валерий хоһоонноро үйэтитиллибитигэр махтаннылар. Кинигэни кыыһа, СӨ Айылҕа харыстабылын министиэристибэтин пресс-сулууспатын салайааччыта Анна Валерьевна Васильева хомуйан бэчээккэ таһааттарбыт.

Валерий Иванович биир дойдулаахтарыгар, устудьуон доҕотторугар киэҥ билиилээх, үтүө майгылаах доҕор быһыытынан сыаналанар. Кини хоһооннорун сэргэ чугас дьонун истиҥ, иһирэх ахтыылара киирбиттэр. Кинигэтин аатыгар»Бэйэм бэйэбинэн» диэн хоһоонугар этиллибитин курдук, олоҕу хайдах баарынан ылынар, киэҥ, сырдык дууһалаах этэ. Оҕо эрдэҕиттэн үөрэҕэр туйгун, киэҥ, дириҥ билиилээх киһи дуоһунаска да, албан аакка да адьаһын тардыспатах ураты майгылааҕа. Киэҥ билиитинэн, элбэҕи аахпытынан даҕаны хаһан да чорбойон көстө-биллэ сатаабат этэ. Ити Валерий тоҕо учуонай эбэтэр суруйааччы буолбатаҕай диэн элбэх киһи миигиттэн ыйытааччы.

Үөрэрбит диэн, кыргыттара эмиэ аҕаларын батан, киэҥ билиилээх, үөрэхтээх, дьоһун үлэһит, ыал буолан, сиэннэнэн, доҕорбут олоҕун салгыыллар.
Валерий Иванович төрөөбүт Хоротугар олус бэриниилээҕэ. Үөрэммит оскуолатыгар кэлэн учууталлаабыта, икки мэндиэмэннээх дьиэ туттубута, айылҕаҕа олус чугаһа, сорсуннаах булчут этэ. Ити үтүө хаачыстыбаларын доҕотторо кинигэҕэ толору арыйбыттар. Хоротун туһунан айбыт хас да хоһоонуттан биирэ нэһилиэкпит өрөгөй ырыата буолан ылланар.
Доҕорбут айбыт хоһооннорун иэйэр куттаахтар ырыа оҥоруохтара диэн бүк эрэллээхпит. Оттон оҕолоро, сиэннэрэ аҕаларын аатын киэн тутта ааттаттахтара.

Марта Николаева,

Дьокуускай

+1
0
+1
0
+1
0
+1
0
+1
0
+1
0
+1
0