«Бэйэбит кыһалҕабытыгар дьүөрэлии иһиттибит…»

Бөлөххө киир:

Кулун тутар 2 күнүгэр Дьахталлар өрөспүүбүлүкэтээҕи сийиэстэрэ саҕаламмыта. Сийиэскэ кытта кэлбит Анаабыр улууһун Үрүҥ Хайа нэһилиэгин дьахталларын сэбиэтин бэрэссэдээтэлэ, эбии үөрэхтээһин киин педагога Сусанна Андросованы кытта билсиҥ.

— Мин Анаабыр улууһуттан дэлэгээт буолан кэллим. Үрүҥ Хайа нэһилиэгин дьахталларын сэбиэтин бэрэссэдээтэлинэн аҕыйах хонуктааҕыта талыллыбытым. Инники өттүгэр бу сэбиэт чилиэнэ этим. Арктика кыһалҕаларыгар болҕомтобун ууран кытта сылдьабын. Тэрээһин туһунан этэр буоллахха, олус үрдүк таһымнаахтык ыытылла турар. Арктическай салааҕа Аллараа Халыматтан Любовь Леонидовна Явловская мэдиссиинэ салаатыгар этиитин биһиги бэйэбит кыһалҕабытыгар дьүөрэлии иһиттибит уонна ылынныбыт. Бу хамсык кэмигэр биһиги бөһүөлэкпит күн бүгүн бырааһа суох олорор. Ананан үлэлии да кэллэхтэринэ, уһаабаттар. Онон олохтоох биэлсэр кыргыттарбыт көрө-истэ, эмтии-томтуу олороллор.

Аны туран төрүүр ийэлэрбит Дьокуускайга кэлэн оҕолоноллор. Оҕолонон баран дойдуларыгар бэйэлэрин үптэринэн айанныыллара ыал бүддьүөтүгэр күүскэ охсор. Ону сэргэ санитарнай авиация кэлиитэ ыраах олорор улуус буоламмыт биһиэхэ уустуктардаах. Дэриэбинэбитигэр бырааһа суохпутун ааһан, урукку өттүгэр уон куойкалаах балыыһабытыгар билигин үс эрэ куойка хаалан турар. Бөһүөлэкпитигэр тыһыынча кэриҥэ киһи олорор. Улаханнык ыалдьыбыт дьон дьэ, кыһалҕаны көрсөр. Саас, күһүн сиринэн суол суох буолан хаайтарыы үгүс буолар. Субсидиялаах бөртөлүөт аҕыйах рейсы оҥорор. Аны туран көтөр киһи ахсаана аҕыйах буоллаҕына, бөртөлүөт көппөт.

Сийиэскэ кэлэн атын улуустар кыһалҕаларын истэн, кэпсэтэн киһи уопут атастаһар, санаатын этинэр. Бу сарсыарда «Развитие народной дипломатии международного сотрудничества» диэн сессияҕа кытынным. Бүтүн өрөспүүбүлүкэ дьахталларын маннык түмэн сүрүн кыһалҕаны быһаарасар олус туһалаах эбит диэн бэлиэтиэм этэ. Инникитин салгыы үлэлэһэргэ былаан элбэх.

Ульяна ЗАХАРОВА.

+1
0
+1
0
+1
0
+1
0
+1
0
+1
0
+1
0