«Бэйэбэр уонна чугас дьоммор куттал суоһаабатын»

Ааптар: 
Бөлөххө киир:

Тус бэйэлэригэр уонна чугас дьонноругар куттал суоһаабатын туһугар, Саха сирин олохтоохторо коронавирус утары быһыыны ылаллар.

Саха сиригэр COVID-19 утары быһыыны ылыы көхтөөхтүк салҕанар. Өрөспүүбүлүкэ олохтоохторо СИА коронавирус утары быһыыны ыллахха, дьону дьаҥҥа сыһыарыахпыт диэн дьиксиммэккэ, куттаммакка дьиэттэн тахсалларыгар кыаҕы биэрэрин туһунан санааларын үллэстибиттэр. Өрөспүүбүлүкэ олохтоохторо олох урукку тэтимигэр түргэнник төннөр туһуттан, быһыыны ыларга ыҥыраллар.
ХИФУ устудьуона Аида Татаринова быһыыны ылан баран, туох да сибикини билбэтэҕин этэр.
«Коронавирус утары бастакы быһыыны олунньу саҥатыгар ылбытым. Бэйэм туохтан да куттаммакка, дьиксиммэккэ сылдьаарыбын уонна чугас дьоммун харыстааммын. Кырдьаҕас эбэбин харыстыыбын. Быһыыны ыла тиийбиппэр, медсиэстэрэ иммунитет туһунан сиһилии быһааран биэрбитэ. Үгүс киһи бастакы дуозаны ылаат, дьаҥтан харыстанар курдук саныыр эбит. Ити сыыһа өйдөбүл. Миэхэ медсиэстэрэ быһаарбытынан, иммунитет икки дуоза кэнниттэн үөскүүр эбит. Ол да буоллар, бары санитарнай нуоруманы тутуһуохха наада. Холобур, мин быһыыны ылан баран, туох да сибикини билбэтэҕим. Онон бары иммунитеттанарбыт туһугар, мин санаабар, бары ылыахпытын наада«, — диэн этэр.
Устудьуон уонна урбаанньыт Александр Козлов быһыыны бары маассабайдык ыллахпытына урукку олох тэтимигэр төннүөхпүт, уулуссаҕа дьулайыыта, долгуйуута суох тахсар кыахтаныахпыт диэн эрэнэр.
«Быһыыны мин үһүс поликлиникаҕа саҥа партия кэлбитигэр, муус устар 13 күнүгэр, ылбытым. Бу да иннинэ ылбыт киһи диэн саныыр этим. Быһыыны ылыы — сөптөөх быһаарыныы диэн толкуйдуурум. Олунньуга Москваҕа, Питерга сырыттахпына, аҕытаассыйалыыр бырагыраамаҕа, вакцинация кэмигэр биллэр-көстөр дьону-сэргэни мааска кэтэн баран хаартыскаҕа түһэргэ ыҥыраллар, кинилэр онно  вакцина туһунан кэпсииллэр. Биһиэхэ, холобур, саха эстрадата итиннэ маарынныыр тугу эмэ толкуйдаан оҥороро буоллар бэрт буолуо эбит. Уруккубут курдук олорорбут, мааската суох сылдьарбыт уонна маассабай тэрээһиннэр ыытыллалларын туһугар, бары быһыыны ылалларыгар сүбэлиэм этэ», — диэн санаатын үллэстэр.
Быһыыны 65 саастарын ааспыттар эмиэ көхтөөхтүк ылаллар. Мэҥэ Хаҥалас улууһун биэнсийэлээхтэрэ быһыыны ылан баран арыый холкутуйбуттарын, бэйэлэрин уонна аттыларыгар баар дьоннорун харыстыылларын туһунан этэллэр.
«Элбэх киһини кытары алтыһабын, онон бэйэбин да, кинилэри да харыстыыр туһуттан быһыыны ыларга быһаарыммытым. Дьонум эмиэ бары ылбыттара. Онон интэриниэтинэн тарҕанар араас сурахха-садьыкка итэҕэйбэккэ, быһыыны ыларгытыгар сүбэлиибин«, — диир Зиновий Игнатьев.
Аллараа Бэстээххэ олорор 76 саастаах Надежда Бубякина иккис быһытын ылаары кэтэһэр. «Биһиэхэ, Аллараа Бэстээххэ, кырдьаҕастарга табыгастаах, сөптөөх «ЭпиВакКорона» аҕалыллыбытын туһунан эппиттэрэ. Аны билигин 20 чыыһылаҕа иккиспин ылаары күүтэбин. Билигин батсаабынан араас иһитиннэриилэр кэлэллэр, дьон куттанар, араас киһи баар буоллаҕа. Билэр дьонум уонна быраас дьүөгэлэрим быһыыларын ылан баран этэҥҥэлэр. Мин сыл ахсын кирииби утары быһыыны хайаан да ылабын уонна иммунитетым онтон күүһүрэригэр итэҕэйэбин«, — диэн Надежда Романовна кэпсиир.
СИА
+1
0
+1
0
+1
0
+1
0
+1
0
+1
0
+1
0