Маны аах Тыа хаһаайыстыбата

“Бэйэ үүтэ, этэ баара үчүгэй!”

Тас дойдулар сааҥсыйаларын кэмигэр бэйэ бородууксуйатынан хааччыныы сүрүн сорук буолла. Биһиги сэлиэнньэбитигэр кэлиҥҥи кэмҥэ эдэр ыаллар саха төрүт дьарыгар — сүөһү иитиитигэр ылсан эрэллэрэ киһини үөрдэр эрэ.

Биир оннук ыалынан үс оҕолоох Евдокия уонна Александр Николаевтар буолаллар. Ыал аҕа баһылыга Александр Николаевтан оттооһун хайдах баран иһэрин туоһуластым. Онуоха кини бэрт улгумнук бу курдук кэпсээтэ: «Сүөһү ииттэр буолбуппут алта сыл буолла. Билигин төбөлөөҕүнэн 15 сүөһүлээхпит. Уонтан тахса туонна отунан сыл тахсааччыбыт. Быйыл окко от ыйын 9 күнүгэр киирдибит. «Абааһы мунньаҕа» диэн баарын билэбин. Кырдьаҕастар этэллэринэн, ол иннинэ эбэтэр кэннинэ киириэхтээххин. Ону саха киһитэ буоларбынан кытаанахтык тутуһабын. Кыракый «Тайшань» тыраахтардаахпын. Онон оҕустарабыт, мустарабыт уонна,төһө кыалларынан, дьиэ таһыгар аҕала сатыыбыт. Эһээбитинээн иккиэн оттуубут. Оттуур сирбит биир кэлим буолбатах, кыра-кыра араас алаастарга оттуубут. Тыраахтарым кыра буолан, наһаа элбэх сэлээркэни сиэбэт, биир буочуканан (200 лиитэрэ) сайыны туоруубун. Билиҥҥи туругунан алта туонна оттоннубут. Өссө да оттуур былааннаахпыт. Сүөһү ииттэрбит наһаа да оннук барыстаах дии санаабаппын гынан баран, бэйэ үүтэ-этэ баара үчүгэй, тирэхтээх курдук сананаҕын! Төгүрүк сыл эт сии олорорбут туох куһаҕаннаах буолуой? Ол иһин эдэр ыалга туһаайан этиэм этэ: сүөһүтэ ииттиҥ, дэриэбинэҕэ да дьол баар!», — диэн Александр кэпсээнэ сэргэх, инникигэ эрэллээх. Кырдьыга даҕаны, элбэх эдэр ыал тыаҕа олохсуйан, сүөһү-ас туталлара буоллар, тыабыт сирэ сайдыа, кэскилэ кэҥиэ этэ.

 

Елена Прокопьева, уопсастыбаннай кэрэспэдьиэн, Мэҥэ Хаҥалас улууһа, Хочо сэлиэнньэтэ.

 

 

 

Хаартыскалары: Е.Прокопьева ыытта.

0
0
Telegram @edersaas20