Үөһээ Бүлүү улууһун Кэнтик нэһилиэгин Булгунньахтаах учаастагар Анна Трофимовна уонна Виктор Павлович Васильевтар бааһынай хаһаайыстыба тэриммиттэрэ отут сыл буолла. Улуус үрдүнэн саамай улахан хаһаайыстыбаны тутан олорор дьиэ кэргэн үлэ-хамнас хайдах барарын маннык кэпсииллэр:
— Биһиги 1992 сыллаахха 15 ынахтаах ыал бааһынай хаһаайыстыба тэринэн, нэһилиэктэн чугас баар Булгунньахтаах учаастакка сүөһү-ас иитэн олорбуппут быйыл номнуо 30 сыла буолла. Билигин биһиги 302 ынах сүөһүнү кыстатан турабыт. Онтон ыанар ынаҕа – 120. Үөһээ Бүлүү улууһугар саамай улахан хаһаайыстыбалаах буолабыт.
2020 сыллаахха «Семейный фермер» диэн граҥҥа тиксэн, алта мөлүйүөн сууманы ылан хаһаайыстыбабытын хаҥатарбытыгар сүрдээҕин туһаммыппыт. Ол курдук, ынах ыыр аппараат, пресс-подборщик, ротарнай от оҕустарар тиэхинньикэ атыыласпыппыт. Маны сэргэ, бу бырагыраамаҕа кыттарбытыгар хотоммутун эмиэ саҥардар туһунан киллэрбиппит.
Билигин сэттэ үлэһиттээхпит. Бэйэбит номнуо сааһыран, тэрээһин үлэтигэр эрэ сылдьабыт. Биэс-алта сыл анараа өттүгэр тэҥҥэ сүөһү көрсөн, оттоһон-мастаһан сылдьыбыт буоллахпытына, билигин итинни барытын кыра уолбут дьаһайар. Билиҥҥи туругунан, 71 ынах төрөөн турар. Күҥҥэ үстэ ыыбыт.
Аны былырыын уһуннук эккирэтиспит гааспыт ситимэ киирэн улаханнык үөрэн олоробут. Дьиэбит-уоппут, хотоммут, гарааспыт барыта гааска холбонон улахан абыраллаах дьыала буолла. Онон түгэнинэн туһанан улууһум салалтатыгар, Тыа хаһаайыстыбатын министиэристибэтигэр улахан махталбытын тиэрдэбит.
Билигин дойду үрдүнэн балаһыанньа уустугурда. Атын тас дойдулар санкциялары биллэрдилэр диэн хаһыакка суруйаллар, тэлэбиисэргэ кэпсииллэр. Бу хааччахтааһыннар биһиэхэ, Арассыыйаҕа улаханнык охсуохтара дии санаабаппын. Хата, бэйэ оҥорон таһаарар бородууксуйабыт өссө элбиэҕэ, тупсуоҕа диэн эрэх-турах сананабын. Дойдубут бэрэсэдьиэнэ Владимир Путин бэлиитикэтин өйүүбүн, биһиги курдук элбэх көмөнү ыла олорор дойду ахсааннааҕа буолуо. Онон бэйэ оҥорон таһаарыытын күүһүрдэн, сибиэһэй бородууксуйанан дьоммутун-сэргэбитин хааччыйыахха диэн баҕа санаалаабын этэбин.
Ульяна ЗАХАРОВА.