Сыл саҥата бары тэрилтэлэр, министиэристибэлэр былаан торумнууллар, ааспыт сылы ырыталлар, мунньахтыыллар. Эн үлэҕэр эмиэ сыллааҕы отчуокка, былааҥҥа баттатан олорор буолуохтааххын. Оттон бэйэҥ тус олоххун былаанныыгын дуо?
Мин санаабар, суох, ордук аҕам саастаах дьон. Дьиҥэ, ол олох сыыһа. Үөһэ суруллубут дьоппуон өһүн хоһооно ону ырылхайдык быһаарар. Былаан – киһи олоҕун сайдыытын төрүөтэ.
Мин бүгүн хайдах сылы былаанныахха сөбүн суруйуом.
Мин былаанныырбын наһаа сөбүлүүбүн. Бэйэм бытаан соҕус туттуулаах буоламмын, былааным болдьоҕу тутуһарга көмөлөһөр. Былаанныыр буоламмын, элбэҕи ситиһэбин дии саныыбын. Суруналыыс буоларым таһынан, мин кэргэммин, түөрт уонна икки саастаах оҕолор ийэлэринэбин, инстаграм ситимигэр фитнескэ бырайыактардаахпын, тус блогпар суруйабын, успуордунан дьарыктанабын, кинигэ ааҕарбын сөбүлүүбүн, араас сэминээрдэргэ үөрэнэбин. Хайа, уонна дьиэтээҕи эбээһинэстэри эбэн кэбис. Маны барытын, киһи сиэринэн син ситиһэн сылдьабын. Ол барыта былаан баар буолан ситиһиллэр.
Саҕалыырга туох нааданый?
Суруллубут – суоруллубат диэн биһиги сахалар этэбит. Оннук. Киһи суруйдаҕына санаата сааһыланар, саҥа идиэйэлэр кэлэллэр, эбэтэр кыһалҕаны атын өттүттэн көрөр буолаҕын. Онон, бастатан туран, былаанныыргар туох эмэ сурунарда ылын. Тэтэрээт, болокунуот, альбом… Мин кытаанах тастаах, кыраһыабай ойуулаах дуу, сөбүлүүр өҥнөөх дуу болокунуоту ыларгар сүбэлиибин. Оччоҕо суруйарга киһи санаата өрө көтөҕүллэн позитивнай эрэ санаалар, былааннар киириэхтэрэ диэн мин эрэннэрэбин.
Сыалы туруорунуу – хамсаныы төрүөтэ
Бастатан туран, олоххун хас да эйгэҕэ араар: дьиэ кэргэн (сыһыан), доруобуйа, үлэ, бэйэни сайыннарыы, духуобунас о.д.а. Бэйэҕит да эбэн биэриэххитин сөп. Хас биирдии эйгэҕэ киэҥи ырыҥалыыр сыаллары туруор уонна суруй. Холобура, биисинэс арыныы, үрдүк дуоһунаска тиксии, атыыны улаатыннарыы, кэргэммин уонна оҕолору кытары сыһыаны тупсарыы, доруобуйаны көннөрүү, сүүрүүнэн дьарыктаныы о.д.а.
Салгыы хас биирдии сыалга сорудах туруорабыт. Холобура, «биисинэс арыныы” диэҥҥэ “биисинэс араҥаларын үөрэтии”. Доруобуйаны көрүнэргэ былаана суох, хамсааһын суох дии саныыбын. Доруобуйаны куруук бүтэһик миэстэҕэ туруорабыт. Ордук тыа дьоно. Онон кыһыл паастанан суруйан кэбиһиҥ «быар УЗИ», «тиис бырааһыгар бар» о.д.а.
Олохпутун уларытыахпытын, атын таһымҥа тахсыахпытын баҕарабыт? Оччоҕо сүрэҕэлдьээбэккэ, илиниэйкэлээх харандааһы ылан, уон икки килиэккэлээх табылыыссата оҥоруохха. Сэрэйбиккит курдук, сыл уон икки ыйын былаанныыбыт. Манна ыксаабаккар ыҥырабын, үөрэ-көтө доруобай сылдьан толороргут булгуччулаах. Билигин тохсунньу томороон тымныытыгар олорон, сайыҥҥы сырылаччы тыкпыт күннээх от ыйын былаанныыр ыарахан буолуон сөп. Онон, саатар сыл бастакы үс ыйын торумнаа. Сорудахтар дьиҥ олоххо сөп түбэһэр буолуотаахтар. Билэбин, баҕар, эн Европаны көрүөххүн баҕарарыҥ буолуо. Ол эрээри, кулун тутарга тута Будапештка көтүү диэн сорудаҕы туруорар сыыһа.
Санаабыккын тута суруй
Салгыы ыйбытын илдьиритэбит. Бу ыйтан тугу кэтэһэҕин? Тугу былаанныыгын? Холобура, мин тохсунньу ый саҥатыгар дэлби сынньанар, барытын аһыыр, утуйар былааннаах этим. Диетаны тутуһар, бээ, ыарахан. Ый иккис аҥаарыгар суол быраабылатын, зумба үҥкүүтүн үөрэтии, харах бырааһыгар көрдөрүү. Бу сыаллартан мин сорудахтары таһаардым. Холобура, “харах бырааһыгар эрий, суруйтар” диэн биир эмэ күҥҥэ суруйан кэбиһэбин. Бу бырааска барыах буолбутум сылтан ордубута, ол эрээри, болокунуоппар киллэрээппин кытары, баҕа санаам туола оҕуста.
Санаабыккын тута суруйар ордук. Санаа түннүк нөҥүө чыычаах элэс гынан ааһарын курдук түргэн, ол кэнниттэн кинини хостоон бул дьэ.
Сылаалаах күн – таһаарыылаах күн
Күнү былаанныырга бириэмэтин туруорар ордук эбит диэн санааҕа кэллим. Эппитим курдук, мин бытаан соҕуспун, онон, быһаарыллыахтаах дьыала чопчу бириэмэтин туруорар киһини көҕүлүүр, кыратык ыксатар да диэххэ сөп.
Мин киэһэ утуйарга сылайбыт, былааммын барытын ситиспит буоллахпына үөрэбин, бүгүҥҥү күнүм дьыалаларын кумааҕыга сотортон улахан үөрүүнү ылабын. Утуйаары сытан, сарсыҥҥы былааммын торумнуубун.
Суруллубут былаан эниэргийэлээх
Күннээҕи былааҥҥар дьиэтээҕи эбээһинэстэри киллэрбэт ордук эбит. Бастаан мин күннээҕи былааммар киэһээҥҥи астааһыны кытары киллэрэр этим. Суруллубут болҕомтону, киһи эниэргийэтин күүскэ тардар. Дьиэ сиппийиитин, оһох оттооһунун, иһит сууйуутун киллэрэн баран, ону күнү быһа толкуйдуу сылдыан, болҕомтоҕун улахан суолталаах боппуруостан, кыһалҕаттан күннээҕи үлэҕэ ууруоҥ. Онон, күн аайы син биир оҥоһуллар «рутинаны» былааҥҥа киллэрбэтэх ордук. Күннээҕи үлэни үөрэ-көтө, түргэнник оҥорон кэбиһэр ордук.
Бу сүбэлэри туһанан, үүммүт саҥа сылы таһаарыылаахтык атаараргытыгар баҕарабын.
Виктория Бястинова, edersaas.ru
Хаартыскалар интэриниэттэн.