Балаҕан ыйын 21 күнүттэн “Мин бизнеһим” кииҥҥэ Предпринимательсво, атыы-эргиэн уонна туризм министиэристибэтэ социальнай бырайыактарынан үлэлиир бэйэ дьыалатын дьарыктанар дьоҥҥо анаан үөрэх ыытарын саҕалаата.
Бу бырагырааманан 20 предприниматель үөрэнэ сылдьар. Кинилэр социальнай эйгэҕэ туһуламмыт бырайыактарга бизнес-былааннары суруйуу, судаарыстыба туох көмөнү оҥорорун туһунан сиһилии билсиэхтэрэ, интэриэһиргиир боппуруостарыгар исписэлиистэр сүбэлэрин ылыахтара. Бастакы күҥҥэ кыттааччылар семинардарга сырыттылар. “Дьоҕус уонна орто бизнес порталын быйыл сааскыттан ыла кэтээн көрөбүн. Кинилэр ыытар вебинардарыгар сылдьан баран, кырдьык, киһиэхэ көмөлөөх, олус туһалаах бырайыак эбит дии санаабытым. Бастакы күн түмүгүнэн тус бэйэбэр туһалаах сүбэлэри иһиттим, ылынным”, – диэн бэлиэтиир “ESL” тылы үөрэтэр киин салайааччыта Елена Кычкина.
Предпринимателлэр түөрт күн устата “Мин бизнеһим” киин преподавателлэрин кытары үлэлэһиэхтэрэ. Ону сэргэ бэйэлэрин бырайыактарын көмүскүөхтэрэ. Сиһилии киин саайтыгар http://portal.b14.ru/ киирэн көрүөххүтүн сөп.
Аграфена КУЗЬМИНА, edersaas.ru