Бэйэ дьарыктаах дьону Биэнсийэ фондатыгар киллэрэр усунуостарыттан босхолуохтара

Бэйэ дьарыктаах дьону Биэнсийэ фондатыгар усунуоһу киллэрэртэн босхолуохтарын сөп. “Российская газета” хаһыат Федеральнай нолуок сулууспатын баһылыгын Михаил Мишустин тылларынан холобурдуур. «Маннык дьоҥҥо нолуок саҥа режимин сүрүн параметрдара бырабыыталыстыбаны кытта сөпсөһүннэриллибиттэрэ, ол эрээри сокуонунан бигэргэниэхтээхтэр«, — диэбитэ кини.

Нолуок сулууспата бэйэ дьарыктаах дьонунан тус бэйэлэригэр үлэлиир (үлэ биэрээччитэ суох), бородууктаны оҥорон таһаарар эбэтэр өҥө оҥорор дьону ааттыыллар. Уонна сылга 2,4 мөлүйүөн солкуобайы эргитиэхтээхтэр (ыйга 200 тыһыынча солкуобай).

Нолуогу кинилэр эрдэ этиллибит 4 быр. ставканан төлүөхтэрэ. “Бу билиҥҥи нолуок тиһигин 6 бырыһыанынааҕар чэпчэки”, — диэн Михаил Мишустин санатта.

Бу ставкаҕа булгуччулаах медицинскэй страховкалааһын тиһигэр киллэрэр усунуос киирэр. “Биэнсийэни страховкалааһын буолбатах, медицинскэй эрэ. Бэйэ дьарыктаах дьонтон  Биэнсийэ фондатыгар усунуостары быһа киллэрии ирдэммэт, — диэтэ Мишустин. – Маны киһи бэйэтэ талыахтаах: өскөтүн кини социальнай биэнсийэни биэс сыл хойутаан ыларын утарбат буоллаҕына, олох да төлөөмүөн син”.

Нолуок саҥа режимин бэйэ дьарыктаах дьоҥҥо кэлэр сылга Москваҕа, Подмосковьеҕа, Калуга уобалаһыгар уонна Татарстаҥҥа эксперимент быһыытынан киллэриэхтэрэ.

Билигин бэйэлэрэ дьарыктаахтар сыллата декларация толоруохтаахтар, физсирэйдэргэ дохуокка диэн 13 быр. нолуок төлүөхтээхтэр эбэтэр урбаанньыт быһыытынан регистрацияланан, нолуогу судургутутуллубут көрүҥүнэн төлүөхтээхтэр.

Бэйэ дьарыктаах дьону чуолкайдыы сатааһын бастаан кыаллыбатаҕа. 2017 сылтан ньээҥкэлэр, ыарыһаҕы көрөөччүлэр, репетитордар, дьиэ сууйааччылар нолуок сулууспатыгар регистрацияланан, «нолуок каникулунан» туһаныахтаахтар этэ. Ол эрээри манан 2149 эрэ киһи туһаммыт.

edersaas.ru