Бүгүн СӨ Урбааҥҥа, эргиэҥҥэ уонна туризмҥа миниистирин бастакы солбуйааччы Максим Карбушев быһа эфиргэ тахсан, ыйытыыларга хоруйдаата. Кини, бастатан туран, урбаан диэн олус уустук салаа, хайысха буоларын бэлиэтээтэ.
Салгыы кини бэйэ дьарыктааҕынан ким буолуон сөбүн быһаарда. Бу көрүҥ, бырайыак Арассыыйаҕа 2019-2020 сылга киирбит буоллаҕына, Саха сиригэр 2020 сыл от ыйын 1 күнүттэн үлэтин саҕалаабыт. Манна 8 тыһыынча бэйэ дьарыктаах киһи баара биллибит. Ол курдук, наймылаһан үлэлэтэр үлэһиттэрдээх буоллаҕына бэйэ дьарыктааҕынан буолар кыаҕа суох. Уонна бэйэтэ оҥорботох эрээри табаары атыылыыр буоллаҕына эмиэ бэйэ дьарыктаах буолбат. Маннык дьарыктаахха киирсибит киһи сылга барыһа 2 мөл 400 тыһ. солк. тахсыа суохтаах. Бэйэ дьарыктаах киһи быһыытынан регистрацияланыаххын баҕардаххына Федеральнай Нолуок сулууспатыгар тиийэр ирдэммэт, “Мой налог” сыһыарыыга регистрацияланыаххын сөп. Аны туран декларация эҥин туттарар ирдэммэт. Ол олус табыгастаах эбит. Бары ыйытыыларгытыгар, мунаарар боппуруоскутугар “Мин биисинэһим” киинтэн кэлэн ыйыталаһыҥ диэн сүбэлээтэ. Итинник дьарыктаахха киирсэр киһи нолуогу 4 быр. төлүүр. Холобур, Индрайверга регистрациялаахтар куттаммакка бэйэ дьарыктаах буолуҥ диэтэ. Хамсык кэмигэр нолуок ставката аччаабытын бэлиэтээтэ.
— Суол кытыытыгар үлэлиир урбаанньыттарга субсидия көрүллэр дуо?
— Көрүллэр. Биллэрин курдук, суол кытыытыгар үлэлиир урбаанньыттарга, холобур, кафелары үлэлэтээччилэргэ 500 тыһыынча солкуобайга диэри субсидия көрүллүөн сөп.
— Судаарыстыбаннай сулууспалаах бэйэтэ дьарыктаах буолар кыахтаах дуо?
— Судаарыстыбаннай сулууспалаах, холобур, кини аатыгар бас билиигэ кыбартыыра суруллубут уонна ону куортамныыр буоллаҕына, бэйэ дьарыктаах буолуон сөп.
— Оройуоҥҥа олоробун. Урбаанньыт хайдах буолуохха сөбүй?
— Хас биирдии оройуоҥҥа “Мин биисинэһим” бэрэстэбиитэлистибэлэрэ бааллар. Онно тиийэн үчүгэйдик сүбэлэтиҥ. Дьокуускайга “Мин биисинэһим” икки офиһа баар.
Хамсык кэмигэр урбаанньыттарга туох көмө оҥоһуллубутун ыйыттылар. Онуоха Максим Геннадьевич 1000 урбаанньыт үбүнэн өйөбүлү ылбытын эттэ. Ону тэҥэ 200 мөл. солк. сыллааҕыта 4 бырыһыаҥҥа чэпэтиилээх иэс быһыытынан биэрбиттэр. Маны сэргэ социальнай хайысхалаах урбаанньыт хайдах буолары эмиэ туоһуластылар. Ону сэргэ кэлэр сылга гостиницалары, хостеллары үлэлэтээччилэргэ ирдэбил киирэр буолбут. Ол курдук гостиница, хостел анал классификацияны ааспыт буолуохтаахтар. Быһата, “хас сулустаах” буолалларын быһаартараллара ирдэнэр.
Ити курдук, миниистири бастакы солбуйааччытыгар араас интэриэһиргиир ыйытыыларын биэрдилэр.
Бэлэмнээтэ Женни Стрюкова
Хаартыска: сахагов