Уопсастыба

Бэйэ биисинэһин саҕалыырга ханнык көмөлөр баалларый?

Бүгүн, балаҕан ыйын 27 күнүгэр, СӨ предпринимательствотын миниистирэ Ирина Высоких быһа эпиргэ таҕыста.

Кини 2018 сылтан урбаан эйгэтигэр дьарыктаах буолуу ахсаана ыалдьыттары көрсүү, туризм, общепит салаатыгар 5000 кэриҥэ үрдээбитин эттэ. Социальнай ситим нөҥүө миниистиргэ үгүс ыйытыы киирдэ. Ол курдук, үгүс дьону предпринимательство пуорума хайдах ааспытын сурастылар.
—Предпринимательство пуорума 50 былаһаакканы түмтэ. Мин сорох былаһааккаларга тус бэйэм сырыттым. Холобур, нолуок туһунан былаһаакканы сэргээтим. Биисинэһи көхтөөхтүк үөрэтии пуорума үгүс баҕалаах дьону түмтэ.
Халыма федеральнай суолугар Өймөкөөн Томторун таһынааҕы Күбэмэ таһыгар баар «Куба» диэн аһыыр сири биир эмит урбаанньыт ылла дуо?
—Сотору кэминэн ити суолга аналлаах өҥө оҥорор урбаанынан дьарыктанар киһи ылсыах курдук. Инниктин итиннэ тымныыны үөрэтэр полигон баар буолуох чинчилээх, онон Күбэмэ таһыгар дьон-сэргэ тохтоон, сынньанан ааһарыгар усулуобуйа баар буолуоҕа.
Судаарыстыба урбаанньыттарга ханнык көмөлөрү оҥороруй?
—Судаарыстыба докумуоннаах, легальнай биисинэһинэн дьарыктанар дьоҥҥо көмөлөһөр. Пандемия кэмигэр бу балаһыанньаны дьон сиһилии өйдөөтө. Үгүс чааһынай тэрилтэлэр дьону аҥардас дуогабарынан эрэ үлэлэппит буоланнар грант өйөбүлүттэн маттылар. Биисинэс эйгэтигэр үрдүк таһымнаах каадыр тиийбэт диэн бэлиэтиэххэ наада. P14 диэн порталлаахпыт. Онно киирэн ханнык судаарыстыбаннай көмөлөр баалларын туһунан билсиэххитин сөп. Өскөтүн, биисинэс-былаан эҥин хайдах оҥоһулларын ыарырҕатар, саҥа саҕалыыр дьоҥҥо «Мой бизнес» диэн дьоҥҥо көмөлөһөр киин үлэлиир. Бу киин улуустарга эмиэ олус көхтөөхтүк үлэлиир. Алтынньы ыйтан порталбытыгар ханнык көмөлөр оҥоһуллуохтарын, куонкурустар тустарынан сииһилии билсээриҥ. Урбаанньыттары өйүүргэ биһиги эрэгийиэммит атын эрэгийиэннэрдээҕэр инники күөҥҥэ иһэр. Атын эрэгийиэннэр биһиэхэ сибээскэ тахсан сүбэ-ама ыйыталлар.
Дьону ордук судаарыстыбаннай өҥөлөр, бэйэ биисинэһин тэринии боппуруостара долгуталлар эбит. Миниистир Ирина Высоких бу хайысхаҕа үлэлэр порталга күннэтэ сырдатылла туралларын уонна саҥа саҕалыыр урбаанньыттарга араас куонкурустар, өйөбүллэр баалларын иһитиннэрдэ.
Ульяна ЗАХАРОВА.

0
0