Өрөспүүбүлүкэ биллэр урбаанньыта Руслан Федотов Мэҥэ-Хаҥалас улууһугар тыа хаһаайыстыбатын сайыннарыыга бэйэтин уочараттаах дьоһун кылаатын киллэрдэ.
Сэтинньи 10 күнүгэр Аллараа Бэстээххэ «Каракаан» диэн эти астыыр сыахтаах маҕаһыыны арыйда. Руслан Федотов былыргы Өлөксөй Каракаантан ууһаан-тэнийэн хаалбыт ыччаттартан биирдэстэринэн буолар. Каракаан хаанын Алексеевтар, Матвеевтар, Максимовтар, Гуляевтар, Степановтар уо.д.а. салгыыллар. Онон, элбэх омуктаах Аллараа Бэстээх бөһүөлэгэр саха биир былыргы аҕатын ууһун киэн туттунуулаахтык санатар аат баар буолла.
«Каракааҥҥа» киирэр лиэнтэ быһыллан, бастакы атыылаһааччылар маҕаһыыны ыы-быччары мустаннар, бастакы атыы-тутуу уу тоҕо түспүтүнүү ыытылынна. Саҥа маҕаһыын кэлэктиибигэр анаммыт алгыс тылларын биллиилээх алгысчыт, олоҥхоһут Петр Тихонов аал уоту оттон, эттэ-тыынна. Маҕаһыын аһыллыытын тэрээһинигэр тыа хаһаайыстыбатын миниистирин солбуйааччы Семен Потапов, Ил Түмэн доруобуйа харыстабылыгар, социальнай харысхалга, нэһилиэнньэ дьарыктаах буолуутугар уонна үлэҕэ бастайааннай кэмитиэтин бэрэссэдээтэлэ Александр Корякин, улуус баһылыга Николай Старостин, Аллараа Бэстээх бөһүөлэгин баһылыга Юрий Колмаков уо.д.а. сырыттылар.
‒ Сахалар бэйэбит аспытын аныгы кэм ирдэбилинэн астаан-үөллээн, тастан киирэр мөлтөх хаачыстыбалаах бородууксуйа тарҕаныытыттан көмүскэнэр гына дьаһаныахтаахпыт диэн санаанан салайтаран бу сыахтаах маҕаһыыны тэрийдим, ‒ диир Руслан Федотов. ‒ Мин тыа хаһаайыстыбатын эйгэтин кытары сүүрбэччэ сыл үлэлэһэн кэллим. Өрөспүүбүлүкэбит уонна улууспут салалталара тыа хаһаайыстыбатын сайыннарыыга ыытар бэлиитикэлэрэ сөптөөҕүн үлэ-хамнас түмүктэрэ бигэргэтэллэр. Маннык дьыаланы тэринии биһиги, урбаанньыттар, тыа дьонугар биир көмөбүт буолар. Инникитин олохтоох салалтаны, хаһаайыстыбалары кытары өссө күүскэ үлэлээн маннык сыахтары, буойуналары элбэтэн иһиэхтээхпит.
Мантан инньэ «Сиибиктэ» маҕаһыыҥҥа сыста тутуллубут саҥа тэрилтэҕэ үлэ күөстүү оргуйуоҕа. «Каракааны» сэргэ, «Аар Тайҕа» маҕаһыын аһыллан, булт-алт, балыктааһын алыбар ылларбыт дьону наадалаах табаардарынан хааччыйа туруоҕа.
Бу күн, «Каракаан» маҕаһыын аһыллыытыгар даҕааһыннаран, улуустааҕы «Идэһэ» быыстапка-дьаарбаҥка ыытыллан, тыа хаһаайыстыбатын бородууксуйатын оҥорон таһаарааччылары саҥа маҕаһыыннар иннилэригэр түмтэ. Бааһынай хаһаайыстыбалар, биирдиилээн ыаллар, «Хоту», «Тумул», «Лена», «Павловскайдааҕы үүт собуота» кэпэрэтииптэр, «Майатааҕы үүт кэмбинээтэ» ХЭУо кыттаннар, үрүҥ ас уонна эт арааһа атыыланна.
Аркадий ИННОКЕНТЬЕВ, “Саха сирэ” хаһыат, edersaas.ru