СӨ Бэтэринээрийэҕэ департамена «Ыттарга амарах санаа уйалара» диэн социальнай бырайыак чэрчитинэн хаһаайына суох ыттарга анаан аахсыйа биллэрдэ. Бу аахсыйа 2022 сыл устата ыытыллыаҕа.
Бэлиэтээн суруйдахха, өрөспүүбүлүкэбитигэр Алдаҥҥа, Аллайыахаҕа, Аммаҕа, Анаабырга, Бүлүүгэ, Эдьигээҥҥэ, Ленскэйгэ, Мииринэйгэ, Намҥа, Нерюнгригэ, Ньурбаҕа, Өлүөхүмэҕэ, Сунтаарга, Тааттаҕа, Уус Алдаҥҥа, Хаҥаласка, Чурапчыга уонна Дьокуускайга хаһаайына суох ыттары тутар анал пууннар уонна приюттар бааллар.
Тыйыс тымныылаах Саха сирин усулуобуйатыгар ыттарга мас уйа хайаан да наада. Маннык уйа кыһын тымныыттан, сайын куйаастан харыстыыр. Аахсыйаҕа кыттыан баҕалаахтар хааччаҕа суох төһө баҕарар уйаны оҥорон туттарыахтарын сөп. Ыт уйатын быһа холоон кээмэйэ маннык: үрдүгэ 80 см, кэтитэ 60 см, устата (дириҥэ) 100 см.
Ыйытыылаах, этиилээх буоллаххытына, “Амарах санаа уйалара” («Добрые будки») диэн бэлиэтээн gvn2008@mail.ru почтаҕа суруйуохха сөп.
Ульяна ЗАХАРОВА.
СИА хаартыската.