Дьокуускай куоракка бэйдиэ сылдьар ыт ахсаана аһара элбээбитин ааһан, кэлиҥҥи кэмҥэ дьоҥҥо саба түһүүлэрин туһунан социальнай ситимҥэ киэҥник тарҕанна. АГАТУ, ипподром оройуонугар ыттар дьахтарга, кэлин устудьуон кыыска саба түспүттэр.
«Помоги выжить» аһымал пуонда иһинэн кыыллары тутар пуун бэйдиэ сылдьар ыттары тутууга ардыгар илиитэ тиийбэтинэн, куорат дьаһалтата Жилкомсервис, Якутдорстрой тэрилтэлэр массыыналара көмөлөһөр буоллулар. Хас биирдии массыынаҕа ыттары тутар анал үлэһиттэри сыһыарыахтара. Маны таһынан хас биирдии сайаапка, социальнай ситимҥэ киирбит үҥсүү аайы массыыналар тиийиэхтэрэ диэн куорат дьаһалтатын баһылыгын солбуйааччы Егор Кардашевскай иһитиннэрдэ.
«Помоги выжить» аһымал пуонда иһинэн кыыллары тутар пуун салайааччыта Екатерина Безрученко: «Ахсынньы 2 күнүгэр АГАТУ оройуонугар икки хабыр майгылаах ыттары пуун үлэһиттэрэ туттулар. Үлэһиппитигэр саба түһэ сыспытын иһин утутан баран тутан пууҥҥа аҕаллыбыт. Бу ыт үйэ саас тухары пуунтан тахсыбакка иитиллиэҕэ. Баҕар, кэлин ким эмит харабыл гына ылыаҕа. Ахсынньы 1 күнүгэр борокоратуура дьиэтигэр Алексей Корнилов, куорат баһылыгын солбуйааччы кыттыылаах мунньах буолбута. Бэйдиэ сылдьар ыттар дьыалаларын быһаарыы туһунан кэпсэтистибит. Инникитин биһиги пууммутун баҕар куорат дьаһалтатын бас билиитигэр биэриэхтэрэ. Чэ, көстөн иһиэҕэ».
Бу кыһалҕа туһунан салгыы «Саха сирэ» хаһыат кэлэр нүөмэригэр сиһилии ааҕаарыҥ.
Ульяна ЗАХАРОВА.
СИА хаартыската.